Полицейлер мен мемлекеттік органдардың өкілдері автовсапаржай маңындағы аумақта, «Манақбай базары» маңы мен Лермонтов-1, Мамыр көшелерінің қиылысындағы нүктелерге барды. Жергілікті полиция қызметінің бастығы Арман Қаптаев осы аталған орындар заңсыз сауда неғұрылым көбірек жүргізілетін нүктелер болып саналатынын айтады.

Форма киген адамдарды көрген бойда сатушылар тауарларын жинап, қаша жөнелді. Қашып үлгермегендерді полицейлермен сұхбат күтті.  Қалып қойғандары саудагерлерде қажетті құжаттар табылмаған жағдайда ескертулер рәсімдеді. Бірнеше мәрте құқық бұзғандарға  5-10 айлық есептік көрсеткіш көлеміндегі айыппұл салынды.

Арман Қаптаевтың сөзінше, осы жылдың мамырынан бастап жергілікті полиция қызметі заңсыз сауда жүргізген азаматтарға қатысты 1500-ға жуық хаттама толтырып үлгерген.  Заңсыз сауданы толығымен жоюға  сауда үйлерінің иелері де кедергі болуда.

- Осындай көріністердің алдын алу үшін сауда үйлерінің әкімшілігін де жауапқа тарту керек, - дейді ЖПҚ бастығы. – Біздер құрылыс бөлімімен бірлесе сауда үйлерінің басшыларымен жұмыс істей бастадық. Алайда өздеріңіз көргендей, сауда жалғасуда. Біреуіне айыппұл салсақ, ол орынға екінші біреу келіп тауарын қояды. Мұндай заңсыз сауда негізінен  сапаржай, «Манақбай» мен «Караван» сауда үйлерінің қасында өршіп тұр.

Сонымен қатар, қалалық әкімдік ЖПҚ-мен бірге жер учаскесін рәсімдемей сауда жүргізетін және абаттандыру ережелерін аяқасты еткен автодүңгіршектермен күресті қолға алды. Мәселен, ғимарат қасбетінің сүреңсіз келбеті үшін 1 Мамыр көшесіндегі «ВЕКО» дүкеніне 30 АЕК көлеміндегі айыппұл салынды.

Хот-догтарды саудалайтын 1 Мамыр, 40 мекенжайындағы тағы бір автодүңгіршек қаланың сәулеттік келбетін бұзған деп танылды. Бұл сауда орнының иелеріне жақын арада орындарын босату міндеттелді.

- Бір ай ішінде сегіз, жылдың басынан 30-ға жақын  дүңгіршектің орнын босаттық, - дейді қалалық сәулет және құрылыс бөлімі жоспарлау және құрылыс секторының меңгерушісі Жангелді Шалғымбаев. – Бұл жұмыс жалғасады. Мұндай заңсыз дүңгіршектерді  айып тұрақтарына әкетеміз.

Айбек Жұматов

Фото: автор

pavlodarnews.kz

Тэги: заңсыз сауда, жергілікті полиция қызметі, әкімдік