«Самұрық-Қазына» ҰӘҚ» АҚ баспасөз қызметінің мәлімдеуінше, «Самұрық-Қазына» ресейлік «Интер РАО» энергетикалық компаниясынан «Екібастұз МАЭС-2» АҚ-ның 50% акциясын сатып алу жөніндегі мәмілені аяқтады. Осылайша, маңызды электрэнергия активі Қазақстан Республикасының бақылауына толығымен өтті.

- «Самұрық-Энерго» АҚ мен «Интер РАО» ЖАҚ акциялары тең негізінде иелік еткен Қазақстан-Ресей бірлескен кәсіпорны 2005 жылы құрылды, - деді баспасөз қызметінде. – Қазақстан тарапы үшін қоғам қызметінің басым бағыты станцияны кеңейту және қайта құру шеңберінде 636 МВт болатын үшінші энергоблокты орнату болып табылады. Бұл жобаны іске асыру Қазақстанның электр энергиясы мен электр қуатына өсіп келе жатқан қажеттіліктерін қамтамасыз етуге, оның экспорттық әлеуетін арттыруға ықпал етеді.

2009 жылы Қазақстан Республикасы мен Ресей Федерациясының Үкіметтері арасындағы келісім шеңберінде «Екібастұз МАЭС-2» АҚ «Екібастұз МАСЭС-2 №3 энергоблогының құрылысы» жобасын іске асыруға кірісті. 2010 жылы тиісті жобалау-сметалық құжаттама әзірленіп, мемлекеттік сараптамадан өтті. Осының негізінде «Екібастұз МАЭС-2» АҚ-ның 50 пайыз үлесін сатып алу туралы шешім қабылданды.

«Самұрық-Қазына» ҰӘҚ» АҚ қоғаммен байланыс және маркетингтік коммуникациялар жөніндегі департаментінің хабарлауынша, станцияны толық бақылау жән 3-ші энергоблокты сату жөніндегі жобаны іске асыру еліміздің энергетикалық тәуелсіздігін арттыруға ықпал ететін болады. Қазіргі уақытта Қазақстанда жаңа өндіруші қуатты енгізу қажеттілігі бар. Ұлттық экономиканың өсуін қамтамасыз ету үшін электр энергетикасы саласының озық дамуына ықпал ету керек.

Фото: ашық дереккөздерден

pavlodarnews.kz

Тэги: Павлодар, Екібастұз, МАЭС-2