Жобаның жетекшісі - аудандық орталықтандырылған кітапхана жүейсінің директоры Қарлығаш Түсіпбекованың айтуынша, бұл арна коронавирусқа байланысты карантин кезінде үйде отырған балаларға қызықты ақпарат беріп, уақытты пайдалы әрі тиімді өткізуге мүмкіндік береді. 

- Бүгінгі күні жұмыстың алғашқы қадамдары жасалды, - дейді Қарлығаш Түсіпбекова. - Алдағы уақытта барлық ауылдық округтердің кітапханашылары тартылатын болады. Біздің басты мақсат - жас ұрпақ бойында ұлтқа деген сүйіспеншілігін жоғалтпау. Сонымен қатар, фейсбук әлеуметтік желісінде жүргізу жоспарланып отыр. Ауыл кітапханаларында өскелең ұрпаққа мол мәлімет беретін, тәрбиелік маңызы зор әрі әсем суреттермен безендірілген балалар кітаптары жетерлік.

Жобаны жүргізуші орталық кітапхананың кітапханашысы Толқын Шоманова ертегілердің басым бөлігі 1-6 жас аралығындағы бүлдіршіндерге арналғанын айтады.

- Біздің дыбыс жазатын арнайы студиямыз жоқ, - дейді ол. - Соған қарамастан, кітапханашыларымыз ертегілерді ұялы телефонның диктафонына жазып, программист маман Ардақ Өскенбаевқа жібереді. Ол түрлі суреттерді пайдаланып, дыбысты өңдейді. Бүгінде елдегі жағдайға байланысты кітапханашылар үйден жұмыс істеп жатыр. Еңбекақы жүруде. Сондықтан бос отырмай балалардың уақытын тиімді өткізуге өз үлесімізді қосуды жөн көрдік. Психологтардың зерттеуі бойынша, балалар көп үйде отырғанның өзінде күйзеліске ұшырайды. Сондықтан әлеуметтік желілер арқылы ертегілерді тыңдауды насихаттап жатырмыз.

Май аудандық кітапхана желісінде 12 кітапханашы жұмыс істейді. Бүгінде «Балаларға базарлық» каналында «Қолғап» ертегісі мен «Қожанасырдың әңгімелері» орналастырылған. Алдағы уақытта басқа да қазақ халық ертегілері мен өзге ұлттың ертегілерін де оқу жоспарланып отыр.

-  Кейбір кітапханашылардың немерелері алыста тұрады, - дейді Толқын Шоманова. - Олар да басқа қалаларда отырып, әжелерінің дауысын естиді.   Қазіргі әлемде болып жатқан  жағдай  заман талабына сай технологияларды меңгеруге де себепші болып жатыр.  «Көш жүре түзеледі» дейді ғой, бұл бастамамызды алдағы уақытта әрі қарай дамытамыз.

Ақбота Сейсенбаева

Фото: Май ауданының ішкі саясат бөлімі

 

pavlodarnews.kz

Тэги: covidk