Бүгінгі күні облыс бойынша «Қазпошта» бөлімшелері төтенше жағдай уақытында штаттық режимде жұмыс істеп жатыр.

- Бұрыннан бері біз сексеннен асқан қарияларымызға зейнетақысын үйлеріне жеткізіп беретінбіз, - дейді «Қазпошта» АҚ облыстық филиалының директоры Ерік Әліпұлы. - Енді ТЖ кезінде барлық зейнеткерлерге зейнетақыны үйге жеткізу туралы шешім қабылдадық. Жалпы өңірде 24 мың зейнеткер бар. Оның 7 мыңы картамен алса, 5 мыңы - 80 жастан асқан зейнеткерлер. Қалған 12 мың адам зейнетақысын жеке шоттарынан алып отыратын. Бүгінде біз осы кісілермен өткен айдың соңынан бастап байланысқа шығып, зейнетақыларын картаға аудару туралы ұсыныстар айтып жатырмыз. Бұл ұсынысымызды басым бөлігі қабыл алып жатыр. Оларға карталар шығарып, үйлеріне жеткізу жұмыстары да басталды. Ал, келісім бермеген адамдарға қызметкерлеріміз зейнетақыны үйлеріне жеткізіп беретін болады.

Ерік Әліпұлының айтуынша, барлық бөлімшелерде жұмыс істеп жатқан қызметкерлер жеке қорғаныс құралдарымен қамтамасыз етілген. Атап айтқанда, бетперделер, антисептиктер және қолғаптар таратылды.

- Пошта жеткізуші қызметкерлеріміз атап өткен жеке қорғаныс құралдарынан басқа, қорғаныс костюмін де киетін болады, - дейді филиал директоры. - Зейнетақыны өзіміз келіп аламыз деген қарияларға сақтық шараларын сақтау бойынша ұсынымдарымыз бен өтініштерімізді айтудамыз. Оған қоса, біз жеткізу көліктерін де дезинфекциядан өткіземіз. Сондай-ақ бөлімшелеріміз бұрын күніне бір рет тазартылатын болса, бүгінгі күні күніне үш рет тазартылып, жуылып тұрады.

Айта кетейік, «Қазпошта» АҚ облыстық филиалында 1000-ға жуық адам қызмет атқарады.

Айгүл Жүсіпова 

Фото: ашық дереккөздерден

pavlodarnews.kz

Тэги: