Бұл туралы баспасөз жиынында Павлодар облысы денсаулық сақтау басқармасы басшысының м.а. Біржан Досмаилов мәлім етті.

-    4 сәуірдегі жағдай бойынша облысымызда вирусты жұқтырған 1 адам бар, - деді Біржан Досмаилов. – Бұл 1988 жылы туылған азамат жеке боксқа жатқызылған. Жағдайы жақсы. Онымен 34 адам байланысқа түскен. Олардың бәрі тексерістен өтті.  Ал, 120 адам жанама байланыста болған.

Коронавирус жұқтырған азаматпен байланыста болған адамдардың 29-ы Павлодар облысында болса, 3 адам – Нұр-Сұлтан қаласында, 2 адам – Ақмола облысында. Ал, жанама байланыста болған 120 адамның 86-сы Павлодар облысында және үйлерінде бақылауға алынған. Қалған адамдар басқа өңірлерден.

Сонымен қатар, Біржан Досмаилов осы уақытқа дейін өңірімізде 1645 адам вирусқа қатысты бақылауға алынғанын атап өтті.

-    696 адамнан бақылау алынып тасталды. Олардан вирус табылған жоқ. Қазіргі уақытта 949 адам бақылауда. 33 адам стационарда, 916 адам үй карантинінде, - деді Біржан Досмаилов.

Еске салайық, 27 наурыз күні Павлодар облысында қауіпті вирусты жұқтырған азамат анықталған болатын. Ол Нұр-Сұлтан қаласында коронавирусты жұқтырған адаммен байланыста болған.

Оразбек Саяхат
Фото: ашық дереккөзден

pavlodarnews.kz

Тэги: covidk