Астана қаласынан келген елордалық №48 мектеп-лицейінің директоры Зәуре Садықованың айтуынша, бүгінде жаңартылған білім беру мазмұны бойынша оқып жатқан мектептер бар. Дегенмен бұл ретте кейбір мәселелер бірігіп талқылауды қажет етеді.

- Біз Астана қаласында болғандықтан, жаңартылған мазмұндағы оқу бағдарламасы аясында көбінесе үш тілде білім беру мәселесі жиі көтеріледі, - дейді Зәуре Садықова. - Лицейіміз жаратылыстану-математика бағытында білім береді. Алайда математика бағытында да, тіл жағынан да қабілеті жоғары балаларды бір сыныпқа жинап, үш тілде оқытамыз. Жалпы, бірнеше тілді меңгеру бойынша жұмысты балалардың арасында кішкентай кезден бастаған жөн. Сонымен қатар, оқушыны қызықтыра алатын әртүрлі тәсілмен жеткізген дұрыс. Өзім Павлодардың білім деңгейімен көп жылдан бері таныспын. Өңірдегі оқушылар арасында білімге деген құштарлық бар. Ұстаздарда сол білімді жеткізсем және үйретсем деген талпыныс байқалады. Осы екі мақсат дұрыс қойылған болса, нәтиже де жоғары болады.

Ток-шоу форматында өтіп жатқан кездесуде қатысушылардың барлығына өз пікірлерін білдіріп, сұхбаттастардың дәлелдерімен танысуға мүмкіндік беріледі.

- Жаңартылған білім мазмұны мектеп қабырғасын жаңа аттаған оқушылар үшін ең пайдалы, - дейді дарынды балаларға арналған Абай атындағы №10 лицей-мектебіндегі 1-сынып оқушысының ата-анасы Салтанат Шабажанова. - Себебі, бұл бағасыз оқыту жүйесі. Баланың мектепке психологиялық, моральдік тұрғыда кедергісіз енуіне, бейімделуіне мүмкіндік тудырады. Сынып жетекшінің жоғары біліктілігінің арқасында баламның зерттеу дағдылары жетіліп, шығармашылық дамуына мүмкіндік туып отыр. Соның нәтижесінде қызым қосымша инттелектің сабақтарына барады.

Айта кетейік, білім беру мазмұнын жаңарту жөніндегі кеңейтілген отырысқа «Дарын» аймақтық орталығының басшылары, облыстық білім беру басқармаларының өкілдері, мамандандырылған мектеп директорлары мен оқу-әдістемелік және тәрбие жұмысы бойынша орынбасарлары, мұғалімдер, психологтар және ата-аналар шақырылған.

Оразбек Саяхат
Фото: Маргарита Чудакова

pavlodarnews.kz

Тэги: