Май ауданында шағын трактор құрастырған тұрғын арнайы патентке ие болды

Павлодарда «Жомарт Жүрек» байқауының онлайн дауыс беру басталды

Павлодар облысында 15 діни ғимараттың құрылысы тоқтап тұр

Павлодар өңірінің тумасы Президент сайлауына үміткер атанды

Павлодар облысының мектептерінде хиджаб киюге рұқсат етілген бе?

Түнде үйлеріне қалай жетеді? Павлодарлық ата-ана университеттің жұмыс кестесіне шағымданды

Павлодар облысының үздік 13 педагогы үш миллион теңгеге ие болды

Павлодар облысының әкімі Ақсуда көшпелі кездесу өткізеді

Сқақов ұялы байланыс операторларына: Сапа болмаса, жауапкершілікке тартыласыздар

26.04.2022

Май ауданында шағын трактор құрастырған тұрғын арнайы патентке ие болды

Ерлік Тайшыбаев – Май елінің «Бенджамин Холты». Ол әлемде алғашқы трактор ойлап тауып, ауылшаруашылық саласына зор үлес қосқан ағылшын ғалымының жолын жалғастыруда. Инженер кәсіпкер шағын габаритті тракторлар құрастырып, отандық өнімдерге сұраныс тудырып отыр. Бұл техника импорттық модельдерден әлдеқайда арзан әрі сапалы, деп жазады saryarka-samaly.kz .

Бүгінгі таңда қала көшелерінде, шаруа қожалықтарында және жеке қосалқы шаруашылықтарда, тіпті бау-бақша серіктестіктерінде де шағын тракторды жиі кездестіруге болады. Мұндай техника үнемді. Ол шағын өлшемдерімен шектеулі аумақтарда да пайдаланылады. Ал, қондырғылардың кең таңдауы жұмыстың барлық түрлерін орындауға мүмкіндік бермек. Тағы бір маңызды фактор – бұл «ересек» трактордың құнынан айтарлықтай арзан. Сондай-ақ, отандық өнімнің бағасы шетелдік аналогтармен салыстырғанда қолжетімді.

«Жұмыскер» шағын габаритті тракторын құрастырған инженер Ерлік Тайшыбаевтың айтуынша, бұл техника ауыл шаруашылығымен қатар үй шаруашылығы үшін де өте қолайлы.

- Шағын тракторларды әртүрлі қондырғылармен толықтыруға болады. Яғни, олардың функционалдығы қосымшаларды пайдалану арқылы арта түспек. Сондай-ақ, ауыр техникаға қарағанда оның қолдану аясы әлдеқайда кең. Заманауи шағын тракторларды ауыл шаруашылығымен қатар, егіншілікте, коммуналдық өнеркәсіпте де пайдалануға болады. Кішігірім өлшемдердің арқасында олар маневрлі әрі шапшаң келеді, - дейді ол.

Бүгінгі таңда жерлес инженер «Димаш» жеке кәсіпкерлігін ашып, шаруалар мен фермерлерді отандық шағын тракторлармен қамтамасыз етпек. Бес қызметкер жұмыс істейтін шағын кәсіпорын цехында трактордан бөлек, ауыл шаруашылығына қажет станоктар да құрастырылады.

- Техника құрастыру 2013 жылдан бастап жалғасып келеді. Алғашқыда шағын кәсіпорнымызда кірпіш шығару станогын құрастырдық. Себебі, ауылдық аймақтарға құрылыс материалдарын жеткізу қиындық тудырады. Қазір осындай шағын станоктардың арқасында кез келген елді мекендерде кірпіш шығарылады. Одан бөлек, макулатура мен пластмассаларға арналған престеу станогымыз бар. Сондай-ақ, су құбырларына қажет сақиналар да шығарамыз, - дейді Ерлік Тайшыбаев.

Кәсіпкер былтыр «Бизнес бастау-2025» бағдарламасы бойынша 5 млн теңге грант жеңіп алған. Қазір патенттелген «Жұмыскер» шағын тракторларына сертификаттау жұмыстары жүргізіліп жатқанын естідік. Инженер Ерлік Тайшыбаев техниканы әлі де жетілдіре түспек ойым бар дейді. Оның айтуынша, тракторларға шөп шапқыш, жинағыш, бұрғылау жұмыстарын атқаратын қосымша құрылғылар орнатылмақ.

- Аудан әкімі Ағыбай Әмірин - отандық өнімдерге әрдайым қол ұшын беруге даяр азамат. Ол шағын тракторлардың құжаттарын жинастыруға, оның тиісті мемлекеттік орындардан тіркеуден өтуіне көп көмек көрсетті. Сондай-ақ, аудан басшысы бұл техникаларды сатып алып, аудан орталығындағы жұмыстарға жұмылдыратынын айтты. Қазір барлық жерде көктемгі тазалық жұмыстары жүріп жатыр. Ал, біздің техника - парк пен скверлерге таптырмас құрал. Сонымен қатар, тракторларға қосымша қондырғы орнату мүмкіндігі бар. Болашақта осы қондырғылардың санын көбейту жоспарларлануда, - дейді ол.

Сондай-ақ, Ерлік Тайшыбаев отандық ауылшаруашылық мамандарымен қатар, жеке шаруа қожалық иелерімен де тығыз байланыста жұмыс істемек. Ол шығыны аз шағын тракторларды субсидия арқылы шаруаларға несиеге беру жолдарын да қарастырады. Бүгінгі таңда 1 млн 800 мың теңгеден басталатын шағын тракторлардың құны олардың комплектациясына қарай өсе бермек. Себебі, кәсіпкер техникаға қажет кейбір құрал-саймандарды шетелден алдыратынын атап өтті.

- Тракторлардың гидравликалары мен дөңгелектері Ресейдің Уфа қаласынан жеткізіледі. Себебі, біздің елде жоқ. Сондай-ақ, ол Lifan 192 fd бензин қозғалтқышымен жабдықталған. Одан бөлек, ресейлік автоөндірістің өзге механизмдері қолданылады. Қалған құрал-жабдықтарды өзіміз құрастырып, жинаймыз. Темір қаңқасынан бастап, қосалқы бөлшектеріне дейін отандық шикізат өнімін пайдаланамыз, - дейді кәсіпкер.

Қосымша ақыға жерлес инженер тракторлардың негізгі конфигурациясын өзгертіп, қосалқы бөлшектермен толықтыруға мүмкіндік бар екенін жеткізді. Сондай-ақ, шаруалар өздеріне ыңғайлы тіркемелерге де тапсырыс бере алады. Яғни, алдағы уақытта шағын тракторлардың салмақ жинағы артып, сүйрегіші, қосымша гидравликалық клапандары, кабина немесе қауіпсіздік аркалары пайда болуы мүмкін. Қазіргі кездегі трактордың техникалық сипаттамасына сүйенсек, оның салмағы бар-жоғы 700 келіні құрайды. Ал, жүк көтергіштігі 300 келіден астам заттарды 2800 мм биіктікке еркін көтеріп тасымалдауға мүмкіндік береді. Максималды жылдамдығы сағатына 15 шақырымды құрайды. Жанармай багының көлемі 15 литрге арналған. Ал, трактордың жалпы биіктігі - 1750 мм. Сол себепті, шаруа қожалықтарының иелері мен диқандар қолжетімді әрі шағын өлшемді маневрлік техникаға қызығушылық таныта бастады.

Ерлік Тайшыбаевтың сөзінше, шағын тракторларға еліміздің өзге облыстарынан да тапсырыс түсіп жатыр.

- Трактор – кішкентай болғанымен, шаруалардың қуатты көмекшісі. Бұл техниканы тіпті, ауыл шаруашылығынан алыс адамдар да жүргізе алады. Қаладағы шағын және орта бизнес өкілдері үшін де пайдалы. Жер жырту, шөп шабу қызметтерінен бөлек, трактор шағын аулаішілік көшелерді тазартуға ыңғайлы. «Жұмыскер» деп аталғасын бұл техника жұмыс таңдамайды. Аталмыш тракторларға тапсырыс берушілер қатары көбеюде. Бір тракторды құрастыру уақыты бір жарым - екі ай көлемінде уақыт алады, - дейді инженер.

Бүгінгі таңда шағын габаритті ауылшаруашылық техникасы нарығында негізгі ойыншылар еуропалық және жапондық компаниялар болып табылады. Оңтүстік Кореяның «Киоти» компаниясы олардың өкшелерінен басып келеді. Қытайлық машина жасаушылар да Ресей нарығында мықты позицияларды иелене бастады. Осы орайда, мемлекетіміз отандық трактор жасаушы өнеркәсіп кешендерін жетілдіре түсуі керек. Себебі, еліміздегі ауылшаруашылық саласы жаңа технология мен жаңа техникаларды қажет етеді.

Алтынбек Елемесұлы
Суретті түсірген - Есенжол Исабек

Количество показов: 8569

Возврат к списку

Pavlodarnews.kz АА материалдарын қолдану ережелері