«AMANAT» партиясының облыстық филиалында Халықаралық мүгедектер күніне арналған жылы және жанды кездесу өтті, деп хабарлайды @Pavlodarnews.kz тілшісі.

Филиал баспасөз қызметінің мәліметінше, бейресми кездесуде өмірдегі кедергілерді еңсеріп, спортта, медицинада, шығармашылықта және қоғамдық қызметте айтарлықтай табыстарға қол жеткізген өңір тұрғындары құрметтелді. Іс-шара Халықаралық мүгедектер күніне, сондай-ақ Партияның «Кедергісіз келешек» жобасына орай ұйымдастырылды.

Кездесуге облыстық және қалалық мәслихат депутаттары, облыстық филиалдың төрағасы Асылбек Туғанбай мен атқарушы хатшысы Николай Дычко және партия белсенділері қатысты.

– Алғыс пен қолдау белгісі ретінде барлық шақырылған қонақтарға ақшалай конверттер табыс етілді. Оған демеушілік жасағандар облыстық және қалалық мәслихат депутаттары, «Кедергісіз келешек» жобасының амбассадоры Александр Толмачев, сондай-ақ Арман Рахмашев, Елена Яровенко, Серік Садуақасов, Мадина Музапарова болды, – делінген хабарламада.

«AMANAT» партиясы облыстық филиалының төрағасы Асылбек Туғанбай ерекше қажеттіліктері бар адамдарды қолдаудың маңыздылығын атап өтіп, шақырылған әрбір азаматтың қосқан үлесіне тоқталды.

– Біз үшін тең мүмкіндіктер жасау және қиындықтарға қарамастан, рухы мықты болып, өнеге көрсететіндерді қолдау өте маңызды. Бүгін біз күн сайын шектеулі мүмкіндіктер үлкен жетістіктерге кедергі емес екенін дәлелдеп жүрген адамдарды құттықтаймыз. «AMANAT» партиясы кедергісіз ортаны құруға және белсенді азаматтарды қолдауға бағытталған бастамаларды одан әрі дәйекті түрде ілгерілететін болады, – деді ол.

Шақырылғандар арасында өмірдегі оқиғалары шабыттандыратын және адам рухының күшіне жаңаша қарауға мәжбүр ететін жандар болды. Олардың қатарында үстел теннисінен спорт шебері Галина Беспалая, паралимпиадалық бочча спорт түрінен ҚР спорт шебері Нұржан Майкенов, Екібастұзда екінші диализ орталығын ашуға бастамашы болған Мадина Ибраева, Тереңкөл ауылы аудандық ауруханасының хирургі Павел Файзуллин, жас журналист және суретші Әділхан Қыпшақов және басқалар бар.

Қатысушылар тарапынан да жеке алғыс сөздер айтылды. Мәселен, таэквондо мен тенниспен айналысудан парафутболдан Қазақстан чемпионатына қатысуға және ұлттық құрамаға шақырылуға дейінгі жолдан өткен спортшы және бала кезінен мүгедек Мақсат Серіков «AMANAT» партиясына қолдау көрсеткені және көңіл бөлгені үшін ризашылығын білдірді.

– Бұл жерде болу мен үшін үлкен мәртебе. Шақырғандарыңыз үшін және біздің жетістіктерімізді байқағандарыңыз үшін партияға рахмет. Бұл әрі қарай ілгерілеуге ынталандырады, – деді ол.

Іс-шара өңірде қолжетімді және инклюзивті ортаны құру бойынша шынайы қарым-қатынас, өмірлік оқиғалармен алмасу және одан әрі бастамаларды талқылау алаңына айналды.