Екпінді жел мен құрғақ өсімдіктер өртті сөндіруді қиындатуда, деп хабарлайды @Pavlodarnews.kz тілшісі.

4 сәуір күні 112 пультіне Павлодар облысы Баянауыл ауданының Жасыбай орманшылығында құрғақ шөптің өртенгені туралы хабар түсті.

– Өртті сөндіруге Төтенше жағдайлар департаменті, орман шаруашылығы, «Қазавиаорманқорғау» және Жасыбай орманшылығының күштері мен техникасы дереу жұмылдырылды. Қазіргі уақытта жалынды ауыздықтауға 70-тен астам адам және 20-дан астам техника қатысуда. Екпінді жел мен құрғақ өсімдіктер өрттің тез таралуына ықпал етіп, жағдайды қиындатып отыр, – деп хабарлады облыстық Төтенше жағдайлар департаментінің баспасөз қызметі.

Оқиға орнына облыстық ТЖД басшылығы мен әкімдік өкілдері жетті. Төтенше жағдайлар министрлігі мен облыстық ТЖД командалық орталығында жедел штаб құрылды. Өрт орнына қосымша ТЖД-ның 38 қызметкері мен 11 техникадан тұратын колонна жіберілді.

Ведомствоның мәліметінше, елді мекендерге қауіп жоқ. Өрт тауға қарай өтті.

Жағдай ерекше бақылауда.