Рекордтың ресми танылуы үшін арнайы тәуелсіз бақылаушылар мен нотариус қатысты, деп хабарлайды @Pavlodarnews.kz тілшісі.

Ұзындығы 16,8 метр, көлемі 128 шаршы метр және салмағы шамамен 60 келі болатын Қазақстанның мемлекеттік туы бір дронның көмегімен 180 метр биіктікке көтерілді. 

Бұл бастаманың авторы – «Шаңырақ» халық шығармашылығы және мәдени-демалыс қызметі орталығы. Олар бұл оқиғаны Гиннес рекордтар кітабына тіркеу үшін ресми өтінім берген.

– Біздің бастамамызды қолдаған облыстық мәдениет басқармасына және Павлодар облысы әкімдігіне алғыс айтамыз. Бұл – халқымыздың рухын көтеріп, ел мерейін үстем ететін сәт, – деді «Шаңырақ» орталығының директоры Замира Сұлтанова. 

Рекордты тіркеу үшін Павлодарға Global Book of Records халықаралық ұйымының өкілі, Азия және Африка елдері бойынша бас офицері Қуаныш Құдайбергенов арнайы келді. Оның айтуынша, бұл рекордтың ерекшелігі – көлемі үлкен туды алғаш рет бір ғана дронның көтеруі. Бұған дейін Ресейде көлемі 60 шаршы метр болатын туды төрт дронның көмегімен көтеру тәжірибесі болған.

– Әлемде рекордтарды тіркейтін бірнеше халықаралық ұйым бар. Ең танымалы – Гиннес рекордтар кітабы. Ал Global Book of Records негізінен Азия мен Африкада жұмыс істейді. Павлодарда көтерілген ту көлемі мен биіктігі жағынан ерекше рекорд саналады, – деді ол.

Рекордтың ресми танылуы үшін арнайы тәуелсіз бақылаушылар мен нотариус қатысып, тудың өлшемдері мен биіктікке көтерілгенін растады.

Айта кетейік, бұған дейін Павлодарда ұлттық киім – кимешек бойынша рекорд тіркелген болатын. Ұзындығы 5 метрден асатын кимешек 2000-нан астам әшекеймен көмкеріліп, Ертіс Променад сахнасында жұрт назарына ұсынылған еді.