Өңірде халық көп жиналатын қоғамдық орындарға 40-қа жуық дабыл терминалы орнатылған, деп хабарлайды @Pavlodarnews.kz тілшісі.

Павлодар облысында тұрғындардың құқық қорғау органдарымен жедел байланысуына мүмкіндік беретін «SOS» дабыл түймелері бес жылға жуық уақыттан бері жұмыс істеп келеді. Жыл басынан бері бұл құрылғылардың көмегіне 20 азамат жүгінген.

Павлодар облысы полиция департаментінің мәліметінше, өңірдегі халық көп жиналатын қоғамдық орындарға барлығы 38 дабыл терминалы орнатылған. 

— Әрбір құрылғы бейнекамерамен және дауыс зорайтқышпен жабдықталған. Азамат «SOS» түймесін басқан сәтте бірден жедел басқару орталығының операторымен байланысқа шығады. Оператор өтініш берушіні бейне арқылы көріп, болған жағдайдың мән-жайын нақтылап сұрай алады. Барлық аудио және бейнежазбалар жүйеде автоматты түрде сақталады, - делінген хабарламада.

Биыл павлодарлықтар терминалдарды көбіне жол қозғалысы ережелерінің бұзылуы, заңсыз автотұраққа қою, мүлік ұрлығы және жоғалған туыстарын іздеуге көмек сұрау бойынша пайдаланған. Әрбір хабарлама түскен бойда жедел басқару орталығының операторлары оқиға орнына ең жақын полиция патрульдерін жібереді.

Ведомствоның мәліметінше, бұл құрылғылар қылмыстарды «ізін суытпай» ашу көрсеткішін айтарлықтай арттырған. Терминалдарға орнатылған бейнекамералар мен жақын маңдағы бейнебақылау жүйелерінің көмегімен тәртіп сақшылары құқық бұзушының қозғалыс бағытын жедел анықтап, оның қашу жолын дер кезінде бұғаттай алады.