Жыл басынан бері полицейлер рұқсат етілмеген жерге көлік қойған мыңнан астам жүргізушіні анықтады, деп хабарлайды @Pavlodarnews.kz тілшісі.

Облыстық полиция департаментінің мәліметінше, жергілікті тұрғындар көліктерін белгіленбеген жерлерге қойып, жаяу жүргіншілерге және басқа да жол қозғалысына қатысушыларға елеулі қолайсыздық туғызып отыр. Бұл жедел жәрдем, өрт сөндіру және құтқару қызметтерінің еркін қозғалысына да кедергі келтіреді.

– 2025 жылдың басынан бері облыс полицейлері 1642 жүргізушінің көлігін рұқсат етілмеген орынға қойғанын анықтап, барлығын әкімшілік жауапкершілікке тартқан. Құқық бұзушылар жиі келтіретін себептердің ішінде «5 минутқа шығып келдім», «банкоматтан ақша алдым» және «су сатып алуға жүгіріп барып келдім» сияқты сылтаулар алдыңғы орында тұр, – делінген хабарламада.

Полиция жол қозғалысы ережелерін сақтау мен өзара құрметтің маңыздылығын еске салып отыр. Құқық бұзушылықты байқаған жағдайда куәгерлерге фото немесе бейнежазба жасау, уақыт пен орнын белгілеу, әрі қарай бұл материалдарды полицияға немесе «Police 102» мобильді қосымшасы мен @dp_pavlodar Instagram парақшасына жолдау ұсынылады.