Депутаттар шешімге бірауыздан дауыс берді, деп хабарлайды @Pavlodarnews.kz тілшісі.

Қалалық мәслихаттың сессиясында жұмыспен қамтуды үйлестіру және әлеуметтік бағдарламалар бөлімінің басшысы Гүлбарам Белялова тұрғын үй көмегін беру тәртібі мен мөлшерін өзгертуді ұсынды.

– Біз аз қамтылған отбасыларға жиынтық табысқа шекті жол берілетін шығыстардың үлесін 7%-дан 5%-ға дейін төмендетуді ұсынамыз, – деді Гүлбарам Белялова. – 2023 жылы тұрғын үй көмегін тағайындауға 16,7 миллион теңге бөлінді. 1 шілдеге 7% есеп айырысу кезінде 435 отбасы 9,4 миллион теңгеге көмек алды. 2023 жылдың соңына дейін 5% есептеу кезінде 750 отбасы шамамен 23 миллион теңгеге көмек алады.

Мысалы, егер Павлодар тұрғынының зейнетақысы шамамен 80 мың теңге болса, бұрынғы жеті пайызбен жаз айларында тұрғын үй көмегіне жүгіне алмайтын еді. Ал бес пайызбен алушылар саны екі есе артады. 

Депутаттар бұл ұсынысты бірауыздан қолдады.

Естеріңізге сала кетейік, тұрғын үй көмегі – аз қамтылған отбасыларға тұрғын үйге, коммуналдық қызметтерді төлеуге берілетін жергілікті бюджеттен төленетін төлем.