Еліміздің барлық облыстары мен ірі қалаларында еріктілер мен белсенділер алдағы референдумның маңызын халыққа жеткізу үшін ауқымды ақпараттық науқанға кірісті, деп хабарлайды @Pavlodarnews.kz referendum2026.kz сайтына сілтеме жасап.

«Әділетті және Прогрессивті Қазақстанның Халықтық Конституциясы үшін!» жалпыұлттық коалиция белсенділері өңірлерде кең ауқымды ақпараттық-түсіндіру іс-шараларын қолға алды. Астана қаласынан бастау алған жұмыс Қарағанды, Қостанай, Павлодар, Солтүстік Қазақстан облыстары мен Шымкентте жалғасын тапты. Белсенділер белгіленген орындарда үгіт-насихат плакаттарын ілумен қатар, ақпараттық парақшаларды азаматтарға таратуда.

Жалпыұлттық коалиция мүшесі, «Жастар рухы» төрағасының орынбасары Ержан Хамитов науқанға еліміздің барлық өңірінен жастар белсенді қатысып жатқанын атап өтті.

– Коалиция жұмысы басталысымен үш республикалық маңызы бар қала мен 17 облыста құрылған коалиция филиалдары жанындағы белсенділер жүйелі іске кірісті. Бүгінде жастар офлайн форматта ақпараттық материалдарды таратып, азаматтарға Жаңа Конституцияның мазмұны мен 15 наурызда өтетін референдумның маңызын түсіндіруде. Сонымен қатар, әлеуметтік желілер арқылы да кең аудиторияны қамтып, онлайн кеңістікте белсенді түсіндіру жұмыстары жүріп жатыр. Негізгі мақсатымыз – қоғамға алдағы саяси науқанның мәні мен маңызын жан-жақты жеткізу, – деді ол. 

Коалиция өкілдерінің мәліметінше, ақпараттық іс-шаралар облыс және қала орталықтарымен қатар, аудан мен ауылдық елді мекендерді де қамтып отыр. Алдағы уақытта «Есіктен есікке» акциясы ұйымдастырылып, тұрғындармен жеке форматта жүздесу жоспарланған. Бұл бастама аясында азаматтардың сұрақтарына нақты жауап беріліп, қосымша материалдар ұсынылады.

Бұдан бөлек, Жалпыұлттық коалиция мүшелері республика көлемінде кездесулер ұйымдастырып, Жаңа Конституция жобасының негізгі бағыттары мен ұсынылып отырған өзгерістердің мәнін кеңінен талқылауда. Тұрғындармен ашық пікір алмасу форматында кездесулер өткізіліп, азаматтардың сауалдарына жауап берілуде.

Айта кету керек, жетекші қоғамдық-саяси күштер «Әділетті және Прогрессивті Қазақстанның Халықтық Конституциясы үшін!» жалпыұлттық коалиция аясында бірікті. Оның құрамына саяси партиялар, қоғамдық бірлестіктер, Парламент пен мәслихат депутаттары, ғылыми-сарапшылық қауым, мәдениет және спорт қайраткерлері, кәсіподақтар мен жастар ұйымдары енген. Қазіргі уақытта коалиция мүшелері еңбек ұжымдарымен және тұрғындармен кездесулер өткізу арқылы ашық диалог алаңдарын кеңейтуде.