«Атамекен» ұлттық кәсіпкерлер палатасында өткен кеңесте су айдындарына қол жеткізу мәселесі талқыланды, деп хабарлайды @Pavlodarnews.kz тілшісі.

Бейнеконференция режимінде өткен жиынға Су ресурстары, Туризм және Экология министрліктерінің өкілдері, сондай-ақ облыстық кәсіпкерлер палатасы мен Ертіс өңірінің бизнес қоғамдастығы қатысты. Күн тәртібіндегі басты мәселе – демалыс орындарын жазғы маусымға дайындау және халықтың суға кедергісіз өтуін қамтамасыз ету болды. Бұл міндет Үкіметтің биылғы қаңтардағы хаттамалық тапсырмасына сәйкес қолға алынған.

Өңірдегі Маралды көлінде демалыс аймағын басқаратын кәсіпкер Гүлмира Отарғалиева Жер кодексінің 69-бабына (қоғамдық сервитут) қатысты нақты сұрақ қойды. Оның айтуынша, кәсіпкерлер жағажайды тазалау, қоқыс шығару, құтқарушылар мен медициналық кезекшілікті ұйымдастыру сияқты ауқымды қызметтер кешенін ұсынады.

– Біз су үшін емес, көрсетілетін қызметтер үшін ақы аламыз. Жағалау сызығының ұзындығы 26 шақырым болса, оның тек 500 метрі ғана біздің жағажайға тиесілі. Яғни, біз суға қол жеткізуге кедергі келтіріп отырған жоқпыз. Адамдарды өз аумағымыз арқылы өткізбей, іргедегі тегін өткелді көрсететін белгі қоюға құқығымыз бар ма? – деп сұрады кәсіпкер.

Су ресурстары және ирригация министрлігінің өкілдері бұл жағдайда заң бұзушылық жоқ екенін растады. Егер демалыс орны қоршалған болса, бірақ қоршау су жиегіне дейін жетпесе және өзге де тегін жағалауларға шығу мүмкіндігі болса, кәсіпкердің әрекеті заңды деп танылады. Басты шарт – кәсіпкер өз учаскесі арқылы өтетін жолды (сервитутты) қамтамасыз етуі тиіс.

Министрлік мамандары «дәл осы жерде ғана тегін демалғысы келетін» азаматтардың шағымдары негізсіз екенін атап өтті. Себебі жақын маңда суға қолжетімді өзге де тегін аумақтар бар. Ведомство өкілдері халықтың суға қол жеткізу құқығымен қатар, кәсіпкерлердің де қызмет үшін ақы алуға толық құқылы екенін түсіндіруі қажет.

Алдағы уақытта «Атамекен» палатасы бұл мәселені екі министрлікпен бірлесе отырып, қосымша талқылауды жоспарлап отыр. Сондай-ақ жергілікті әкімдіктерге жағажайларға кіру ережелерін халыққа егжей-тегжейлі түсіндіру тапсырылды. Бұл өткен жылдары әлеуметтік желілерде туындаған даулы жағдайлар мен кәсіпкерлерге қарсы негізсіз айыптаулардың алдын алу үшін маңызды.