Президент Қасым-Жомарт Тоқаев құтқарушыларға мемлекеттік марапаттар тапсырды, деп хабарлайды @Pavlodarnews.kz.

Мемлекет басшысы салтанатты жиынға қатысушыларды Құтқарушы күнімен құттықтап, төтенше жағдай саласының қызметшілеріне ризашылығын білдірді.

— «Құтқарушы» сөзінің мағынасы — өте кең әрі терең. «Құтқару» — әрдайым игі іс жасаумен, жақсылық істеумен байланысты ұғым. Адам өміріне араша түсу, азаматтарды қауіп-қатерден қорғау, оқыс жағдайға тап болған адамдарға қол ұшын созу, тіпті, олардың қорқынышын басып, жұбату сөз айту — осының бәрі де нағыз құтқарушының бойынан табылатын асыл қасиеттер. Сондықтан халқымыз сіздерді, яғни еліміздің барша құтқарушы мамандарын бейбіт күннің батырлары деп атайды. Бұл — шын мәнінде әділетті баға. Әрине, құтқарушы болу көптің алғысына бөлейтін абыройлы және мәртебелі қызмет екені сөзсіз. Алайда азаматтық қорғаныс саласында адал еңбек ету бәрінің қолынан келе бермейтін шаруа екенін де ұмытпауымыз қажет. Батыл, қайсар, ширақ әрі өжет болу — өз алдына өте маңызды талап екені даусыз. Бірақ құтқарушы ең алдымен елге жаны ашитын отаншыл азамат және білікті маман болуға тиіс. Осындай күрделі жұмысты рухы мықты, жауапкершілігі жоғары, жүректі адамдар ғана таңдайды, — деді Президент.

Қасым-Жомарт Тоқаев төтенше жағдай саласының қызметшілері ешқандай қауіп-қатерден тайсалмайтын, сын сағатта жедел шешім қабылдай алатын, арнайы даярлықтан өткен нағыз кәсіби мамандар деп есептейтінін айтты.

Жиын барысында Президент қызметтік борышын атқаруда көрсеткен ерлігі мен жанқиярлығы үшін бірқатар азаматты марапаттады.

Құтқарушылардың кеудесінде ІІ дәрежелі «Даңқ» ордені, Бауыржан Момышұлы атындағы ІІ дәрежелі «Айбын» ордені, «Құрмет» ордені және «Ерлігі үшін» медалі мен «Ерен еңбегі үшін» медалі жарқырады.