Оған «Жасыл Ел» қозғалысының еріктілері мен облыс әкімі қатысты, деп хабарлайды @Pavlodarnews.kz тілшісі. 

Павлодар облысында «Таза Қазақстан» республикалық экологиялық тұжырымдамасын іске асыру аясында ағымдағы жылдың 18 сәуірінен бастап елді мекендерді санитарлық тазарту бойынша ауқымды іс-шаралар жүргізілуде.

– Негізгі іс-шаралардың бірі 25 сәуірде өткен жалпыоблыстық сенбілік болды. Оған 200 мыңнан астам адам және шамамен 40 мың ұйым қатысты. Жұмыстарды жүргізуге 600-ден астам арнайы техника жұмылдырылды. Нәтижесінде 20 мың тоннаға жуық қоқыс шығарылды. Барлық қатысушылар қажетті құрал-жабдықтармен қамтамасыз етілді.  Қосымша ретінде тазалық айлығы аясында облыс полигондарында халық үшін тұрмыстық қалдықтарды тегін қабылдау жүргізілді, - дейді ұйымдастырушылар.

Акция аясында өңірді көгалдандыруға ерекше назар аударылды. Баянауыл ауданында «Жасыл Ел» қозғалысының еріктілері облыс әкімінің қатысуымен 500-ден астам ағаш отырғызды. 

Жалпы облыс бойынша сенбілік аясында шамамен 30 мың көшет отырғызылды.

Өткізілген іс-шаралар халықтың экологиялық мәдениетін арттыруға, елді мекендердің санитарлық жағдайын жақсартуға және қоршаған ортаға ұқыпты қарау мәдениетін қалыптастыруға бағытталған. 

Айта кетелік, 11 сәуірде өңір қалаларында «Таза қала» экологиялық акциясы өтті. Оның аясында ірі кәсіпорындар мен ұйымдар қоғамдық кеңістіктерді тазалау жұмыстарына белсенді қатысты.