Екібастұзда 30 аулаға толығымен жаңа асфальт төселеді

Екібастұзда 30 аулаға толығымен жаңа асфальт төселеді
Константин Шелковтың иллюстрациялық фотосуреті

Кеншілер шаһарында абаттандыру жұмыстары басталды, деп хабарлайды  @Pavlodarnews.kz тілшісі.

Өткен екі жылда облыстық және қалалық бюджет есебінен қыруар қаржы бөлініп, қаланы абаттандыру бойынша қомақты жұмыс жүргізілді. Биылғы жылы да аталған бағытта жұмыстар жалғасын табады. 

– Облыс әкімі Асайын Байхановтың қолдауымен және қалалық бюджет есебінен тиісті қаражат бөлініп, мердігер ұйымдар уақытылы анықталды. Енді басты мақсат – сапалы, әрі уақытылы белгіленген жоспарды жүзеге асыру, – деп жазды Екібастұз қаласының әкімі Аян Бейсекин Іnstagram парақшасында. 

Биылғы жылы кем дегенде 50 жаңа балалар ойын алаңы орнатылады, 30 аулаға толығымен жаңа асфальт төселеді. Бұл жобаларға 1,5 миллиард теңгеден астам қаражат бөлінді.

Биыл қала жолдарын ағымдағы жөндеуден өткізу үшін екі миллиард теңгеге жуық қаражат бөлінді. Жұмыстар наурыз айының соңында басталған. Ағымдағы жөндеу жұмыстарымен ондаған көше қамтылады.

Сондай-ақ қаланы жарықтандыру және көгалдандыру бойынша да үлкен жұмыстар жоспарланған.