Олардың көбі педогогикалық мамандықтарды таңдаған, деп хабарлайды @Pavlodarnews.kz тілшісі.

Бұл туралы «Дүниежүзі қазақтарының қауымдастығы» республикалық қоғамдық бірлестігі Павлодар облыстық филиалының төрағасы Болат Заут мәлім етті.

– Торайғыров университетінің «Foundation» факультетіне – 75 студент, Әлкей Марғұлан атындағы Павлодар педагогикалық  университетінің «Foundation»  дайындық бөліміне 20 студент қабылданды, – дейді Болат Заут.

Өткен аптада шетелден оқуға келген қандас балалар өз бақтарын сынап, жоғары оқу орындарына емтихан тапсырған. Іріктеу емтиханға ұлты қазақ 130-ға жуық шетелдік жас қатысқан. Емтиханның қорытындысы бойынша 95 қандас аталған университеттерге оқуға қабылданатын болды. 

Еске сала кетейік, облысқа қандастар көбінесе Моңғолиядан келеді. Бүгінгі таңда бұл елден өңірімізге 500-ге жуық қандас қоныс аударған. Оңтүстік өңірлер мен шет елден келген қандастар бүгінгі таңда мемлекет тарапынан қолдау тауып, жұмыстармен қамтылуда.