Түркияның Анталия қаласында асық ойындары мен тоғызқұмалақтан Еуразия кубогы өтті, деп хабарлайды @Pavlodarnews.kz.

Жарысқа Қазақстан, Қырғызстан, Германия, Чехия, Румыния және Түркиядан жиналған асықшылар қатысты. 

Павлодар облысынан 6 спортшы ел намысын қорғап, қоржынға 3 медаль салды. 

Асық атудан «Алтын сақа» Павлодар облысының асық ату федерациясының басшысы Қалибек Қуан «Қазақстан-1» командасы сапында сынға түсіп, 1-орын иегері атанды. 

– Жаттықтырушылар да, асықшыларымыз да өз міндеттерін абыроймен қорғады. Әлемдік деңгейде жақсы нәтижелерге қол жеткізіп жатқанымыз қуантады. Алдағы жарыстарда асықшыларымызға сәттілік тілеймін, – деді Қалибек Қуан.

Бұл жарыста павлодарлық Саят Қизат, Алмас Жармағамбетов өнер көрсеткен «Қазақстан-2» командасы үшінші орынға ие болды.

Ал, бес асық ойынында Павлодар облысының тағы бір спортшысы Мерей Сүлеймен өнер көрсеткен «Қазақстан-2» командасы 2-орынды еншіледі. 

Сондай-ақ Қайрат Жетпісов пен Қуат Бораналиннен құралған «Қазақстан-3» командасы жақсы ойын көрсеткені үшін арнайы Алғыс хатпен марапатталды.

Бүгін жерлестерімізді Қайырбаев атындағы ұлттық спорт клубының ұжымы қарсы алды.