Ең әсерлі естеліктер облыстық музейдің ортақ бейнеролигіне енеді, деп хабарлайды @Pavlodarnews.kz тілшісі.

Г.Н. Потанин атындағы Павлодар облыстық тарихи-өлкетану музейінің мәліметінше, Отбасы күніне орай «Отбасылық әңгімелер» челленджі жарияланды.

Қатысушылар өз отбасының тарихынан сыр шертетін қысқаша бейнеролик түсіріп, естелігін айтып бере алады. Сондай-ақ камераға түскісі келмейтіндер отбасылық фотосуреттерін қысқаша әңгімемен бірге жариялай алады.

Музей қатысушыларға танысу тарихы, ескі фотосуреттер, әженің мәзірі, отбасылық дәстүрлер, әр мерекеде еске түсетін қызықты оқиғалар немесе өздері үшін қымбат басқа да естеліктермен бөлісуді ұсынады.

– Әр отбасының өз тарихы бар, оны сақтау маңызды. Отбасы – бұл тарих, оны біз бірге жазамыз, – деп атап өтті музейде.

Челленджге қатысу үшін бейнероликті немесе фотосурет пен әңгімені Instagram желісінде жариялап, @pavl_muzei парақшасын белгілеу қажет.

Жоба соңында музей қатысушылардың отбасылық тарихтарын бір бейнероликке жинақтауды жоспарлап отыр.