Іріктеу турының жеңімпаздары «Солтүстік» жартылай финалында бақ сынайды, деп хабарлайды @Pavlodarnews.kz тілшісі.

«Senat Open» екінші ашық кубогының іріктеу турына 137 спортшы қатысты. 

– Ойын басында екібастұздық 28 жастағы Асқан Сәкенов сегіз рет жеңіске жетіп, көшбасшы атанды. Талғат Бланкинмен кездесуде қос спортшы тең түсті. Осылайша, Асқар Сәкенов бірінші, ал қарсыласы үшінші орын тұғырынан көрінді. Ал Андрей Алексеев екінші орынға ие болды, – деді ұйымдастырушылар. 

Командалық есепте Екібастұз қаласының спортшылары Павлодар қаласы мен Железин ауданының шахматшыларына дес бермей, жеңіске жетті. Жеңімпаздардан бөлек түрлі санатта үздік атанғандарға арнайы медальдер табысталды. 

2025 жылы «Senat Open» екінші рет өтуде. Ойын барысында үш кезеңдік схема сақталады. Іріктеу турлары Қазақстан бойынша ұйымдастырылады, ал жартылай финал кездесулері бес аймақта өтеді. Ал ақтық мәре Астанада 29 сәуірде үздік споршылардың басын қосады.

Ашық кубоктың жартылай финалы Көкшетауда өтеді.