Павлодарлық волейболшылар маусымды Еуропада аяқтайды

Өкінішке орай, «Pavlodar» жүлде алу мүмкіндігінен айырылып қалды, деп хабарлайды @Pavlodarnews.kz тілшісі.
Қазақстанның Еуропа бөлігінде орналасқан Оралда волейболдан Ұлттық лига командалары арасындағы ел чемпионатының плей-офф кезеңі аяқталып келеді. Өз тобында павлодарлықтар «Таразды» 3:1 есебімен ұтып, «Жетісудан» 0:3 есебімен ұтылды. Бұл жеңіліс павлодарлықтардың жүлделі орындар аламыз деген үміттеріне балта шапты.
Одан кейін екі матчқа созылған текетіресте павлодарлықтар бірдей 3:1 есебімен «Есіл СК» командасын тізе бүктірді. Бұл біздің жігіттерге алматылық «Буревестникпен» бесінші орын үшін таласуға мүмкіндік берді. Өкінішке орай, Сергей Глебовтың командасы үшін бірінші ойын сәтсіз аяқталды. Алматылықтар үш сетте жеңіске жетті.
Маусымның аяқталуына дейін павлодарлықтардың бір ғана ойыны қалды – «Буревестникке» қарсы екінші матч. Жерлестеріміз жағдайды түзеп, жеңіске жетсе, бесінші орынның тағдыры қосымша үшінші кездесуде шешіледі.
Ойын 2 сәуір күні сағат 13.30-да өтеді. Тікелей трансляцияны Қазақстан волейбол федерациясының ресми YouTube арнасынан көруге болады.