Мамандар ата-аналармен, мектептермен және кәсіпорындармен тиімді өзара іс-қимыл әдістерімен бөлісті, деп хабарлайды @Pavlodarnews.kz.

Ақсу қара металлургия колледжінде жұмысшы мамандықтар форумы өткізілді. Іс-шара өңірдің дамуына қолданбалы мамандықтардың қосатын үлесін және жастарды кәсіби бағдарлау мәселелерін талқылайтын маңызды алаңға айналды.

Форумның негізгі сәттерінің бірі – «Металлургия» бағыты бойынша орталықтың салтанатты ашылуы болды. Ол заманауи жабдықтармен, WorldSkills және ERG Skills стандарттарына сай оқу материалдарымен, интерактивті тренажерлармен және алдыңғы қатарлы желдету жүйесімен жабдықталған, жаңартылған дәнекерлеу цехымен қамтамасыз етілген.

«Жұмысшы мамандықтар — Қазақстанның болашағы» атты форумның пленарлық бөлімі колледждің мәжіліс залында өтті. Оған мектеп оқушылары, студенттер, педагогтар және құрметті қонақтар қатысты. Шара барысында жұмысшы мамандықтардың маңыздылығы және елдің тұрақты дамуы үшін білікті кадрларды даярлаудың қажеттілігі туралы айтылды.

Форум аясында мектеп оқушыларына арналған кәсіби бағдарлау сессиялары ұйымдастырылды. Тәжірибелі психологтар оқушыларға өз қызығушылықтары, қабілеттері мен еңбек нарығы талаптарын ескере отырып, мамандық таңдаудың маңыздылығы туралы түсіндірді. Сонымен қатар, кәсіби бағдар беруші педагогтарға арналған жеке сессия өтті, онда мамандар ата-аналармен, мектептермен және кәсіпорындармен тиімді өзара іс-қимыл әдістерімен бөлісті.