Жұмыстар электр энергиясын беруді тоқтатпай жүргізіліп жатыр, деп хабарлайды @Pavlodarnews.kz тілшісі.

Ақсуда «Павлодар ЭТК» АҚ-ның Батыс электр желілері кәсіпорны «Ермак-Құрылыс» қосалқы станциясындағы 6 кВ ажыратқышқа жоспарлы жөндеу жұмыстарын жүргізіп жатыр.

Кәсіпорынның мәліметінше, мамандар жабдықты тазалап, жуып, түйіспелердің өтпелі кедергісін тексеруде. Бұл жұмыстар электр энергиясын беру сапасы мен қосалқы станция жабдықтарының сенімділігін арттыруға бағытталған.

– Батыс электр желілері кәсіпорнының мамандары міндетті жұмыстар кешенін орындауда: жабдықты мұқият тазалау және жуу, сондай-ақ түйіспелердің өтпелі кедергісін тексеру жұмыстарын жүргізуде. Бұл шаралар электр энергиясын беру сапасын жақсарту және қосалқы станция жабдықтарының жалпы сенімділігін арттыру үшін қажет, – деді «Павлодар ЭТК» АҚ Батыс электр желілері кәсіпорнының қосалқы станциялар қызметі бастығының орынбасары Максим Юнусходжаев.

«Ермак-Құрылыс» қосалқы станциясы Ақсу қаласы мен оған жақын орналасқан елді мекендерді электр энергиясымен қамтамасыз ететін негізгі энергетикалық нысандардың бірі саналады.

Энергетиктердің айтуынша, жөндеу жұмыстары кезінде тұтынушылар алдын ала резервтік қоректендіру схемаларына ауыстырылған. Соның арқасында Ақсу қаласы мен оған іргелес аумақтарда электр энергиясын беру үзілген жоқ.