Павлодарда алғашқы кәсіби бағдар беру фестивалі — Jumys Party өтті, деп хабарлайды @Pavlodarnews.kz тілшісі. 

«Қазақстан алюминийі» АҚ, «Қазақ электролиз зауыты» АҚ және «ERG Service» ЖШС Batyr Mall сауда орталығында ұйымдастырған фестиваль жүздеген павлодарлықты жинап, оларға 200-ден астам бос жұмыс орындарын ұсынды. Қысқа ғана кеш қалалық ауқымдағы іс-шараға айналды: мамандықтармен танысу шарасы жеңіл, жанды және ойын-сауық тәсілінде өтті.

Өңірдің жетекші компанияларының ресми жәрмеңкеден гөрі атмосфералық фестиваль құру идеясы сәтті шықты. «Қазақстан алюминийі» АҚ персонал және мәдениет жөніндегі директоры Александр Носов тұжырымдаманы былай түсіндірді:

- «Жұмысшы мамандықтар жылына» орай біз стандартты форматтан тысқары шыққымыз келді. Біздің мақсатымыз - адамдарға өздерін осы саланың бір бөлігі ретінде сезінуіне, байқап, қолмен ұстап  көруге болатын кеңістік жасау. Бұл – тек бос жұмыс орындары ғана емес, өндіріс әлемін тану мүмкіндігі. Жастар мен ересектердің бұл шараға белсене қатысқаны қуантады.

«Қазақстан алюминийі» АҚ-ның ПАЗ, КӘК әлеуметтік жобалар жөніндегі сарапшысы Бауыржан Айкенов компаниялардың өздерін ашық және шынайы ұсынуы маңызды екенін атап өтті:

- Jumys Party – бұл бірінші кезекте атмосфералық іс-шара. Адамдар әрбір жұмыс орнында нақты жағдайлар, жеңілдіктер және қамқорлық бар екенін білуі керек. Біз көпшілік бұрын естімеген кешенді жеңілдіктер пакетін ұсынамыз: зейнетақы және медициналық сақтандыру, дүкендердегі жеңілдіктер, жақсы жалақы, қосымша төлемдер, шипажайлар мен демалыс үйлеріне жолдамалар, әлеуметтік көмек, жұмыс киімімен, тамақпен және жеткізу қызметімен қамтамасыз ету. Біз жастардың қызығушылығының артқанын байқадық: ПАЗ және ҚЭЗ үнемі турлар өткізеді, жаңадан қосылатын қызметкерлер саны да тұрақты. Біз кадрлар тапшылығын сезінбейміз – керісінше, адамдар келіп жатыр. «Жұмысшы мамандықтар жылы» бұл тұрғыда жақсы септігін тигізді: жастар өндіріске қызығушылық таныта бастады.

Фестивальде павлодарлықтарға аталмыш кәсіпорындардағы мамандықтар жайлы кеңінен таныстырылды. «ҚА» АҚ-дағы ең сұранысқа ие лауазымдар қатарында аппаратшы-гидрометаллургтер,  слесарь-механиктер, газ кесушілер, электриктер және дизайнерлер бар. «ERG Service» ЖШС электр дәнекерлеушілеріне, токарьлар мен жүк тиеуші мамандарына мұқтаж, ал «Қазақстан электролиз зауыты» алюминий өндірісі үдерісін автоматтандыру операторларын, жүргізушілерді, слесарь-механиктерді және басқа да мамандарды жұмысқа шақырады. Үміткерлерге экспресс-сұхбаттар жүргізіліп, түйіндеме жазуға көмек және жұмыс берушілер туралы қазіргі қызметкерлерден тікелей ақпарат берілді.

Интерактивті іс-шаралар көпшіліктің назарын аударды. Тұрғындар металлургтердің жұмыс киімдерін киіп көруге, құралдарды басқаруға, зауыттар бойынша VR-экскурсияларға баруға, сала туралы білімдерін викторинада тексеруге және жұмысшы маман стилінде суретке түсуге мүмкіндік алды. Бағдарламаның тағы бір ерекшелігі - жеті рет Гиннестің рекордтар кітабына енген Сергей Цырульниковтың осы шараға арнайы қатысуы болды. Ол қонақтарға алюминий монеталарды өз қолымен жасап, сыйға тартты.Фестивальдің жүргізушілері – Евгений Шворнев пен Сергей Закора кешті әдемі  әзілдермен және ерекше байқаулар арқылы әрлендіре түсті. 

Мерекелік атмосфераны  арнайы ұйымдастырылған балалар алаңдары, спорттық жарыстар мен  үміткерлерге арналған ұтыс ойындары да жандандыра түсті. Қатысушылар сауалнамаларды толтырып, нөмірленген билеттерді алды, ал лотерея автоматы жеңімпазды анықтады. Бас жүлде – ең соңғы iPhone 17 – павлодарлық медбикеге берілді, бұл кештің ең жарқын сәттерінің бірі болды деуге болады.

Jumys Party қонақтарының арасында фестивальге тек қызығушылықпен ғана емес, сонымен қатар шынайы үмітпен келген жас ана Нұрила Хамит те болды. Оның отбасы қыркүйек айында Шымкенттен Павлодарға көшіп келген болатын. Нұрила ханым жолдасының сол уақыттан бері жұмыссыз жүргенін алға тартты.  Қазіргі уақытта бала күтіміне байланысты демалыстағы келіншек Ертіс – Баян өңірінде жаңа өмір бастауға пейілді екендіктерін жеткізді:

- Біз кез келген жұмысты қарастыруға дайынбыз. Жолдасым – жоғары білімді заңгер: ол Ішкі істер министрлігінің академиясын бітірген және магистр дәрежесі бар. Бірақ біз үшін қазіргі уақытта тұрақтылық маңызды, - деді Нұрила.

Ол фестивальдің форматы қарапайымдылығы мен ашықтығы үшін ұнағанын атап өтті: жұмыс берушілер тарапынан мүмкіндіктер мен бос жұмыс орындары туралы толыққанды ақпарат берілген. Jumys Party шарасы ERG кәсіпорындарының бірінде жұмыс табылатындығына зор сенім берді.

Тағы бір үміткер Олжас Омаров фестивальге мансап жолын өзгертуге қатысты қызығушылықпен келген. Білімі бойынша заңгер, бірақ қазір мұғалім болып жұмыс істейді, педагогтар кәсіподағына белсенді қатысады. Олжастың үш жоғары білімі бар және өзі атап өткендей,  қазіргі уақытта өнеркәсіптік тақырыптарға қызығушылық танытады.

- Маған электролиз зауытының атмосферасы және өндірісте жұмыс істеу идеясы ұнайды. Өзімді жаңа салада сынап көргім келеді, онда айқын құрылым, өсу және нақты жұмыс істеу мүмкіндігі бар, - дейді ол.

Ол үшін Jumys Party – ҚЭЗ өкілдерімен тікелей байланыс орнату, сұрақтар қою, талаптар туралы білу және команданың құрамына кіру үшін қажетті дайындықты бағалау мүмкіндігі болды.

Jumys Party – сенім, ашықтық және нақты қадам. Павлодарлықтар жұмысшы мамандықтарын таңдау – бұл тұрақтылық,  лайықты жұмыс жағдайлары ғана емес, сонымен қатар отандық өнеркәсіпті дамыту –болашағы зор іс екеніне тағы бір мәрте көз жеткізді.

Жарнамалық материал