Биылғы оқу жылында бюджет қаражаты есебінен колледждерде тегін оқуға мемлекеттік білім беру тапсырысы 6200 орынды құрады, деп хабарлайды  @Pavlodarnews.kz тілшісі.

Облыстық білім беру басқармасының басшысы Самал Айтқазинаның ақпараты бойынша, бұл – рекордтық көлем,  үш жыл бұрынғы көрсеткіштен 37% -ға артық.  2021 жылы  3905 орын болған.

Өңірде техникалық және кәсіптік білім беру жүйесінде 42 колледж жұмыс істейді, оның 12-сі жеке меншік болып табылады. 

– 2024-2025 оқу жылында білім алушылар контингенті 22 мыңнан астам адамды құрайды. Оның ішінде 17,8 мың студент мемлекеттік тапсырыс бойынша оқиды. Облыста заманауи жабдықтармен жабдықталған 10 құзырет орталығы бар. Бұдан басқа, демеушілер мен әлеуметтік әріптестер жыл сайын колледждердің шеберханаларын жаңартып отырады, – дейді Самал Айтқазина. 

2022 жылы ақпараттық технологиялар колледжі қайта жаңартылды, оның базасында қазіргі заманғы IT Hub ашылды. Бүгінгі таңда IT Hub республикалық және әлемдік чемпионаттарға IT мамандарын даярлау үшін облыстық алаң болып саналады.

ERG S.a.r.I меморандумы және «Колледждерге арналған ERG» жобасы шеңберінде облыстың колледждері қазіргі заманғы материалдық-техникалық техникамен жабдықталған.

2022 жылдан бастап республика колледждерінде студенттерді қабылдау аттестаттың орташа балы бойынша емтихансыз жүргізіледі. Жұмыс біліктілігі бойынша оқитын студенттер 100% бюджеттік орындарға әңгімелесу қорытындысы бойынша түседі.

Облыста колледждер жанында 32 жатақхана жұмыс істейді. Өткен жылы Б.Ахметов атындағы педагогикалық жоғары колледж үшін 200 орындық жаңа жатақхана және Павлодар жоғары медициналық колледжі үшін 189 орындық жатақхана пайдалануға берілді.

2024 жылғы 1 қыркүйектен бастап стипендия мөлшері 100%-ға ұлғайтылды: орта буын мамандықтары үшін 20 948 теңгеден 41898 теңгеге дейін, жұмысшы мамандықтар үшін 21 787 теңгеден 43 574 теңгеге дейін.

Меморандумға сәйкес сегіз колледждің екі жыл ішінде Қытай Халық Республикасының Шэньси политехникалық институтының және Шэньси энергетикалық-өнеркәсіптік институтының базасында «Дәнекерлеу технологиясы», «Слесарлық іс» және «Электромонтаж» бейіні бойынша шетелдік тағылымдамадан өту мүмкіндігі бар.

– Ағымдағы жылы «WordSkillsKazakhstan-2024» Ұлттық кәсіби шеберлік байқауының көрсеткіші жақсарды, бүгінде 13-орыннан еліміздің үздік командаларының төрттігіне ендік. Облыс екі алтын, екі күміс, екі қола және 13 медаль жеңіп алды, – деп атап өтті басқарма басшысы. 

Қазіргі таңда студенттердің 85% стипендия алады. Бұдан басқа, жұмысшы біліктілігі бойынша оқитын студенттер бір реттік тегін тамақпен қамтамасыз етілген.

Облыста «Жас маман» жобасы іске асырылуда, онда экономиканың 10 бағыты бойынша құзырет орталықтары құрылатын 10 колледж анықталған. Аталған жобаны іске асыру жастардың кәсіби дамуына, еңбек нарығындағы бәсекеге қабілеттілікке және экономиканың түрлі кезеңдерінде сұранысқа ие мамандарды даярлауға зор үлес қосуы мүмкін.

2024 жылы облыстағы колледж түлектерінің жалпы саны 6337 адамды құрады, олардың 4986 -сы мемлекеттік білім беру тапсырысы бойынша білім алады, жұмыспен қамту деңгейі 98%-ды құрайды.

Кәсіпорындардың өтінімдері бойынша кадрларды міндетті түрде жұмыспен қамтитын нысаналы даярлау енгізілді. Облыс колледждерінде 1770 студент білім алуда. 2025 жылы бұл көрсеткішті 2000 студентке дейін арттыру көзделіп отыр. 

Еске сала кетейік, Жұмысшы мамандықтар жылы аясында өңірде жұмысшы мамандықтарға қызығушылықты арттыру үшін бірқатар іс-шаралар өтеді. Жұмысшы мамандықтарды танымал етуге, жастар арасында беделді арттыруға бағытталған «Мамандық Fest» форумын, семинарлар, презентациялар мен хакатондар өткізу жоспарлануда.