Жеті айда өңірдегі орталықтарда жарты миллионнан астам мемлекеттік қызмет көрсетілді, деп хабарлайды @Pavlodarnews.kz тілшісі.

«Азаматтарға арналған үкімет» мемлекеттік корпорациясы» КЕАҚ Павлодар облысы бойынша филиалының мәліметінше, өңірдегі ХҚКО-ларға күніне орта есеппен 3,5 мың, ал айына шамамен 80 мың тұрғын жүгінеді.

Павлодар облысында 235 қызметкер еңбек ететін 15 халыққа қызмет көрсету орталығы жұмыс істейді. Мұнда тұрғындар жеке куәліктерін рәсімдеп, жылжымайтын мүлік пен көлікті тіркеп, жүргізуші құжаттарын алып, әлеуметтік және басқа да мемлекеттік қызметтерге жүгіне алады.

Жыл басынан бергі жеті айда ХҚКО қызметкерлері 261 889 мемлекеттік қызмет көрсеткен. Тағы 292 018 қызметті тұрғындар өзіне-өзі қызмет көрсету аймақтары арқылы өз бетінше алған. Осылайша жеті айда көрсетілген қызметтердің жалпы саны 550 мыңнан асты.

Келушілер көбейген уақытта орталықтардағы мамандар жүктемеге қарай қайта бөлінеді. Сұранысы жоғары бағыттар күшейтіліп, тұрғындарға қажетті қызметті алу тәсілі түсіндіріледі.

Жүктемені азайту үшін цифрлық сервистер де қолданылады. Бірқатар мемлекеттік қызметті «ХҚКО» және eGov Mobile мобильді қосымшалары, екінші деңгейдегі банктер мен өзіне-өзі қызмет көрсету аймақтары арқылы алуға болады. Сондай-ақ ХҚКО-ға баратын уақытты алдын ала брондап, дайын құжаттарды постамат арқылы алу мүмкіндігі қарастырылған.

Қызметкерлердің психоэмоционалдық жағдайына да назар аударылады. Жеті айда өңірдегі ХҚКО қызметкерлеріне 129 психологиялық тренинг өткізіліп, 69 жеке консультация берілген.

Мемлекеттік корпорация қызмет көрсету процестерін жетілдіру және цифрлық сервистерді дамыту жұмыстары жалғасатынын хабарлады.