Облыстық «Жастар ассамблеясының» белсенділері ҚР Адам құқықтары жөніндегі уәкіл жанындағы «Еркіндік рухы» жастар қанатымен бірлесіп экологиялық-құқықтық сағат өткізді, деп хабарлайды @Pavlodarnews.kz тілшісі.

Облыстық «Жастар ассамблеясының» төрағасы Рамиль Смайыловтың айтуынша, республикалық «Таза Қазақстан» акциясы аясында ұйымдастырылған іс-шараның негізгі мақсаты жастардың экологиялық мәдениетін қалыптастыру, құқықтық сауаттылық деңгейін арттыру және қоршаған ортаны қорғау мәселелеріне назар аударту болды.

Акция барысында қатысушылар Усолка өзенінің жағалау аумағын тазалау жұмыстарын жүргізіп, тұрмыстық қалдықтардың едәуір көлемін жинап, қалалық ортаның экологиялық жағдайын жақсартуға сүбелі үлес қосты.

– Практикалық бөлімнен кейін мазмұнды пікірталас ұйымдастырылып, онда азаматтардың экологиялық жауапкершілігі, табиғатты сақтаудағы жастардың рөлі, сондай-ақ экологиялық құқықтар мен міндеттерді сақтау мәселелері қарастырылды. Қатысушылар табиғи ресурстарға ұқыпты қараудың маңыздылығын және осындай бастамаларды тұрақты түрде өткізудің қажеттілігін талқылады, – деді Рамиль Смайылов. 

Іс-шараға Павлодар облысы бойынша Адам құқықтары жөніндегі уәкіл Игорь Тарасенко да қатысты. Ол өз сөзінде экологиялық акциялардың маңыздылығын атап өтіп, жастардың белсенділігі мен бейжай қарамайтынын жоғары бағалады, сондай-ақ қатысушыларды қоршаған ортаны қорғау мәселелерінде алдағы уақытта да бастамашыл болуға шақырды. Соңында ол барлық қатысушыларға олардың қосқан үлесі мен белсенді азаматтық ұстанымы үшін алғысын білдірді.

Осындай іс-шараларды өткізу тек экологиялық жағдайды жақсартуға ғана емес, сонымен қатар жастардың қоршаған ортаға жауапкершілікпен қарауын қалыптастыруға, құқықтық мәдениетті дамытуға және азаматтық белсенділікті нығайтуға ықпал етеді.