Жаңа асфальт ауа-райының қолайсыздығынан тозбайды, деп хабарлайды @Pavlodarnews.kz тілшісі.

Павлодар қаласы әкімінің орынбасары Әнуарбек Амановтың айтуынша, биылғы жылы 15 көшеде жол жөндеу жұмыстары жоспарланған. Оның ішінде төрт жоба 2024 жылдан бастап жүзеге асырылуда. Осы жобалар үшін бес миллиард теңге қажет.

Сондай-ақ 2025 жылы қара жолдың жалпы ұзындығы 17,2 шақырымды құрайтын жөндеу жоспарлануда.

– Биыл Ұлттық жол активтері орталығының ұсынысы бойынша ұсақ тасты мастикалық асфальтты қолданамыз. Бұған дейін ұсақ түйіршікті ыстық асфальт қолданылған. Жаңа үлгідегі асфальт облыстың ауа райы жағдайына сай келеді. Климаттың күрт континенттік болуына байланысты асфальтта жарықтар пайда болады. Ұсақ тасты мастикалық асфальт тығызырақ, климатқа бейімделген, құрамында целлюлоза бар. Жол төсеу технологиясы бұрынғысынша қалды, – деп қосты әкімнің орынбасары.

Жаңа асфальт осы көшелерге төселеді: 

• Геринга (Сұрағанова көшесінен Минина көшесіне дейін);
• М. Жүсіп (Олжабай Батыр – Бекмаханов);
• Назарбаев даңғылы (Торайғыров – Естай және Жаяу Муса –Ладожская);
• Малайсары Батыр (Российская көшесінен бастап Шарбақты көпіріне дейін);
• Олжабай батыр көшесі;
• Аймауытов көшесі (Қамзин – Российская); 
• Назарбаев даңғылы (Торайғыров – автожол №2);
• Елгин көшесі;
• Шевченко көшесі;
• Гагарин (Назарбаев – Қаз правда);
• Абая (Кривенко – Ломова);
• Сұрағанов көшесі;
• Ермаков көшесі;
• Павлова (Нұрмағамбетов– Шевченко және Циолковский – Ломов);
• Қамзин көшесі.

Жол таңбасы түнде ауа температурасы +10 градусқа жеткенде жасалады. Жол қозғалысын тоқтатпау үшін таңбалау жұмыстары түнде жүргізіледі.

Сондай-ақ, Әнуарбек Амановтың айтуынша, биыл ұзындығы 15,7 шақырымды құрайтын 13 тротуарды жөндеу жоспарланған.