Студенттер балаларға шашты безендіру және бекіту әдісін көрсетті, деп хабарлайды @Pavlodarnews.kz тілшісі.

Байқау шеберлік сабағы форматында шаштараздарға арналған Baby Skills жобасы аясында мектеп оқушылары үшін ұйымдастырылды. Бұл жоба халықаралық WorldSkills жобасының бір бөлігі болып табылады. 1-4 сынып оқушылары мата, декоративті элементтер және желімдеу пистолетінің көмегімен шашқа тағатын ерекше бантик-шаш қызықтырғыштар жасады.

Қызмет көрсету саласы колледжінің директоры Азамат Қашитовтың айтуынша, бұл байқау төртінші жыл қатарынан өткізілуде. Алғашқы екі жылда балаларды тігін ісіне баулып, олар аппликация жасаған еді, ал 2024 жылы ұйымдастырушылар шаштараз өнеріне басымдық беруді ұйғарды. Оқу-өндірістік жұмыс жөніндегі орынбасар Жұлдыз Мұқанова байқаудың басты мақсаты – жұмысшы мамандықтарын насихаттау, оқушылардың шығармашылық ойлау қабілетін және ұсақ моторикасын дамыту екенін атап өтті.

– Қазіргі таңда балалар гаджеттерге көп уақыт бөледі, ал біз оларға демалыс кезінде қолмен жұмыс істеп, қиялын дамытып, жаңа дағдыларды үйренуге мүмкіндік бергіміз келеді, – дейді Жұлдыз Мұқанова.

Биылғы байқауға жеті қыз бала қатысты. Оларға шаш қыстырғыштарын жасауға «Шаштараз өнері» мамандығында оқитын колледждің үшінші курс студенттері көмектесті.

– Біз шеңберлерді желімдеп, олардан бантиктер жасап, жұлдызшалар жапсырдық. Мен бұл шаш қыстырғыштарын мектепке тағамын, тіпті қалай тағатынымды да ойластырып қойдым. Үйде дәл осындай шашқа арналған бұйымдар жасағым келеді, – деп әсерімен бөлісті Аманжол Шамкенов атындағы мектептің оқушысы София Зигангирова.

Байқау ұйымдастырушылары қаладағы барлық мектептермен ынтымақтасып, оларды қатысуға шақырады. Сайысқа алдын ала іріктеусіз, кез келген мектептің бір қатысушысы қатыса алады. Жас шеберлер үшін жағымды бонус – сыйлықтар болды: қатысушыларға шоколад, бояу кітапшалары және байқауға қатысқаны туралы дипломдар табыс етілді.

Жұмысшы мамандықтар жылы аясында колледж 7-9 сынып оқушыларына арналған Junior Skills байқауын 3 сәуірде өткізуді жоспарлап отыр. Одан кейін ерекше білім беру қажеттіліктері бар балаларға арналған «Абилимпикс» сайысы өтеді. Ал қорытынды кезеңде колледж студенттері арасында негізгі WorldSkills жарысы ұйымдастырылады.