Чемпионат Ресей, Беларусь және Қазақстаннан 15 мыңнан астам қатысушыны біріктірді, деп хабарлайды @Pavlodarnews.kz тілшісі.

Инновациялық Еуразия университетінің студенті Анель Прудникова XVII Халықаралық «IT-Планета 2026» олимпиадасы аясында өткен «Пайдаланушылар кубогы 2026» жастар чемпионатында бірінші орынды иеленді.

– Финалдық жарыстардың қорытындысы бойынша студент АКВИС Лаб компаниясының «AliveColors бағдарламасында цифрлық графиканы жобалау және жасау» бағыты бойынша бірінші орынды иеленді. Сонымен қатар ол «Инсайт» командасының құрамында командалық есепте үшінші орын алып, жүлдегерлер қатарынан көрінді, – деді Инновациялық Еуразия университетінің баспасөз қызметі.

Финалға 42 өңір мен шет мемлекеттерден іріктелген 156 үздік қатысушы ғана өтті. Қорытынды кезеңде олар 15 командаға бөлініп, заманауи цифрлық технологияларды пайдалана отырып, кешенді практикалық тапсырмаларды орындады.

– Конкурстық тапсырмалар қатарында виртуалды әлемдерді 3D-құрастыру, жобаларды визуализациялау, low-code платформаларында деректерді талдау, мәтіндер мен суреттер генерациясы үшін нейрожелілермен жұмыс істеу, сондай-ақ цифрлық графика жасау болды, – делінген хабарламада.

Студенттің тәлімгері, оқытушы Людмила Шоклева бұл жетістік Анельдің табандылығы мен кәсіби дайындық деңгейінің нәтижесі екенін атап өтті.

Сондай-ақ университетте студенттерді байқауға даярлауда информатика және бағдарламалық технологиялар кафедрасының аға оқытушысы Ирина Ляшенконың да үлесі ерекше екені айтылды. Ол қатысушыларға олимпиадалар мен кәсіби жарыстарға дайындық барысында әдістемелік және ұйымдастырушылық қолдау көрсетіп келеді.

Университет қызметкерлері атап өткендей, Анель Прудникованың бұл жеңісі Қазақстанның IT саласындағы білім сапасының жоғары деңгейін көрсеткен маңызды жетістік ретінде бағаланды.