ЖОО-дағы білімін ол Ассамблея гранты арқылы алған, деп хабарлайды @Pavlodarnews.kz тілшісі.

Рамиль Смаилов 1995 жылғы 30 тамызда Павлодар қаласында дүниеге келген. Балалық шағынан бастап ел Конституциясы мен Қазақстан халқы Ассамблеясы оның өмірлік бағытына айналды.

Мектепте жүргенде Рамиль Смаилов оқушылардың өзін-өзі басқару ұйымын басқарды, балалар омбудсмені болды, қатарластарына құқықтық ағартушылықпен айналысты.

– Әсіресе, 2010 жылғы Конституция күнін ерекше есімде сақтаппын. Ол кезде біз жағалауда іс-шара өткіздік. Сол сәтте ойыма бірінші рет: «Қандай керемет, мен Конституциямен құрдаспын! Қазір біз балалар құқығы туралы Конвенцияны, азаматтардың құқықтарын насихаттап жүрміз» деген ой келген еді. Бұл сәт жадымда терең сақталып қалды, – дейді ол.

Негізгі заң мен ҚХА-ның құрдасы болу Рамильге ерекше жауапкершілік жүктегендей болды.

– Мен осы жолды қазір жаңа деңгейде жалғастырып келемін. Бұрын жас белсенді болсам, қазір «Ассамблея жастары» ұйымында жаңа буынды тәрбиелеумен айналысамын. Өз тәжірибеммен бөлісіп, жастарға өмірде өз орнын табуға көмектесемін. Оларға бірлік пен заңның күші бар екенін үйретемін, – дейді ол.

Ассамблея қатарында Рамиль өз мамандығын ғана емес, достар мен ұстаздарын тапқан. Оған Зара Кожахметова, Минир Галеев, Наталья Нефёдова, Элина Массагутова, Раиса Афанасьева сынды тұлғалар ақыл-кеңесін беріп, қолдау көрсеткен.

Торайғыров университетінің журналистика факультетінде оқып жүргенде Рамиль ҚХА кафедрасын құруға атсалысты және дипломдық жұмысын БАҚ-тың этносаралық және қоғамдық келісімді нығайтудағы рөліне арнады. Кейін ол оқуын тарих факультетінде жалғастырып, Қазақстандағы полиэтностық қоғамның қалыптасу тарихын зерттеді.

Еңбек жолын ол «Жасыл ел» еңбек жасақтарының Павлодар қалалық штабының командирі болып бастады.

– Өзім 11 жыл оқыған №24 мектепке қайта оралдым. Қазір тарих және құқық пәнінің мұғалімімін. Дәл осы жерде еліміздегі тұңғыш Қазақстан халқы Ассамблеясы сыныбын ашуға бастамашы болдым. Биыл ол сынып түлектерін шығарып салдық, бәрі жоғары оқу орындарына түсті. Бұл – мен үшін үлкен мақтаныш. Ассамблея мен Конституция идеялары жас ұрпақ бойына сіңіп, елдің болашағын құруға ықпал етіп жатқанын көру – ерекше қуаныш, – дейді педагог.

2023 жылы Рамиль Смаилов облыстық ҚХА төрағасының қоғамдық орынбасары болып сайланды. Ол – аймақтағы тарихта алғаш рет жастар арасынан шыққан орынбасар. Ал биыл сәуірде Қазақстан Республикасындағы Адам құқықтары жөніндегі уәкіл жанындағы жастар құқықтары жөніндегі комиссия құрамына кірді.

– Мен үшін Конституция мен Қазақстан халқы Ассамблеясы – күнтізбедегі ресми күндер немесе тарих беттері ғана емес. Бұл – менімен бірге өсіп, өмір жолымда бағыт беріп келе жатқан құндылықтар. Конституция маған әділдікті, еркіндікті және теңдікті бағалауды үйретті. Ассамблея болса, елдің күші – бірлікте, сыйластықта және сенімде екенін көрсетті, – дейді ол.

Белсенді қайырымдылық қызметі үшін биыл Рамиль Смаиловқа Мемлекет басшысы мемлекеттік награда – «Шапағат» медалін табыстады. Сондай-ақ оның марапаттарының қатарында ҚХА-ның «Алғыс» медалі, ҚР Президенті мен Мәдениет және ақпарат министрлігінің Құрмет грамоталары бар. Ол екі мәрте мемлекеттік «Менің табысым – ел табысы» және «Ertis Daryny» сыйлықтарының лауреаты атанды.

Фото: Рүстем Ануарбеков және Рамиль Смаиловтың жеке мұрағатынан