№8 мектеп-лицейде оқушыларға арналған ерекше жоба – «DigitMuseum Hackathon» өтті, деп хабарлайды @Pavlodarnews.kz.

Іс-шара облыстық білім басқармасының қолдауымен ұйымдастырылды. Мектеп мұражайындағы экспонаттарды цифрлау бойынша хакатон өткізу – өңіріміз бен еліміздің жас азаматтары үшін аса маңызды бастама. Бұл тек техникалық сайыс емес, тарихи жадыны сақтау мен болашақ ұрпаққа арналған цифрлық мұра қалыптастыруға бағытталған игі қадам. Қарқынды дамып жатқан технологиялар заманында оқушыларды цифрлық құралдарды меңгерумен қатар, оларды шынайы өмірдегі мәселелерді шешуге қолдануға үйрету өте өзекті.

Музей экспонаттарын цифрлау арқылы лицей оқушылары өткенге құрметпен қарауды, жергілікті тарихтың маңызын түсінуді және оны көпшілікке қолжетімді етуді үйренді. 3D-модельдер, интерактивті каталогтар мен виртуалды көрмелер жасау арқылы олар мектеп, қала және өңір тарихын заманға сай танытудың жаңа тәсілдерін меңгерді. Дайындалған цифрлық жұмыстар мұражай қорындағы құнды заттарды тозудан сақтап, туған өлкенің мәдени мұрасын әлемге паш етуге мүмкіндік береді. 

Хакатонның ғылыми мазмұнын Ертіс өңірінің мәдени мұрасы туралы дәрістер мен экспонаттарды сипаттауға арналған әдістемелік қолдау толықтырды. Бұл бағытқа Margulan University оқытушылары, магистранттары мен студенттері атсалысты. Тарих мамандығының магистранты Алимов Никита «Мәдени және тарихи мұра: мәні, сақтау мақсаттары және интерпретация мәселелері» тақырыбында дәріс оқыды. Ал финалдық жұмыстарды бағалау мен ұйымдастыруға тарих ғылымдарының кандидаттары: Нүркен Күзембаев (Margulan University) және №8 лицей мұғалімі Виталий Кожокар қатысты.

Хакатон оқушылардың командалық жұмыс, креативті ойлау, жедел шешім қабылдау және ІКТ-технологияларды қолдану дағдыларын дамытты. Ол тарих пен цифрлық мәдениетті үйлестіріп, дәстүрлі музей ісінің жаңа форматта қайта жаңғыруына жол ашқан іс-шара болды.

27 қараша күні өткен сайысқа 6–10-сыныптардан 5 жас санаты бойынша 170-тен астам қатысушы мен көрермен жиналды. Лицей оқушылары цифрлық археология әлеміне еніп, мектеп мұражайы экспонаттарын 3D форматында қайта жаңғыртты. Олар музей заттарын зерттеп, ғылыми деректерді талдап, тарихи сипаттамаларды анықтап, модельдеуге қажетті аналогтарды іздеді.

Жобалар екі кезең бойынша ұсынылды:

• Тарихи қорғау – экспонаттың тарихын таныстыру, алғашқы 3D-реконструкция элементтерін көрсету, зерттеу нәтижелерімен бөлісу;
• Техникалық демонстрация – Blender және SketchUp бағдарламаларында дайын 3D-модельдерді көрсету, текстуралар, айналдыру, қалпына келтірілген бөліктер және техникалық сапа бойынша жұмыс нәтижесін ұсыну.

Жұмыстардың техникалық бөлігін информатика пәні мұғалімдері Светлана Васина мен Торғын Есенкулова бағалады.

Іс-шара тарих пен технологияның нағыз тоғысқан мерекесіне айналды. Лицей оқушыларының еңбегі нәтижесінде мектеп мұражайының алғашқы 3D-экспонаттары цифрлы қор ретінде енгізілмек.