Көрсетілім Қазақстан Республикасы Президентінің телерадио кешенінің «Шежіреден - болашаққа» атты кинолекторийі аясында өтті, деп хабарлайды @Pavlodarnews.kz тілшісі.

Ауқымды ағартушылық жоба Қазақстан Республикасы Президентінің телерадио кешенінің 30 жылдығына орай ұйымдастырылды. Үздік деректі фильмдер еліміздің 20 өңірінде көрермен назарына ұсынылуда.

Екі күн ішінде «Ертіс» кинотеатрында павлодарлықтар қазіргі Қазақстанның маңызды оқиғалары мен тұлғаларына арналған төрт деректі фильмді тамашалады. Туындыларда жойқын су тасқындары, туризмді дамыту және халықаралық ынтымақтастық тақырыптары қамтылды.

Шығармашылық ұжымды Павлодар облысы әкімінің орынбасары Айгүл Мәлікова құттықтады. Ол Президенттің телерадио кешені тәуелсіз Қазақстанның қалыптасу және даму жолын, ел өміріндегі маңызды тарихи әрі қоғамдық-саяси оқиғаларды жүйелі түрде дәріптеп келе жатқанын атап өтті.

– Отыз жыл ішінде түсірілген деректі фильмдер мемлекетіміздің шежіресін толықтырып қана қоймай, елдің өткені мен бүгінінің сабақтастығын көрсететін, жас ұрпаққа тағылым болатын құнды рухани мұраға айналды. Бүгінгі фильмдер – жай ғана деректі туындылар емес. Олар - өз ісіне адал жандардың тағдырын арқау етіп, елдің өткені мен бүгініне ой жүгіртетін, халықаралық ынтымақтастық пен ұлттық құндылықтарды жаңа қырынан танытатын мазмұнды жұмыстар. Бұл шығармалар көрермендерді бейжай қалдырмай, терең ойға жетелейді деп сенемін, – деді Айгүл Мәлікова.

Кинолекторий аясында қала тұрғындары мен қонақтарына Президенттің телерадио кешенінің жеке продакшн-базасы – Деректі кино орталығы түсірген авторлық фильмдер ұсынылды.

Бағдарламаға төрт туынды енді. «Құлалы аралының тұрғыны» фильмі Каспий теңізіндегі Құлалы аралындағы гидрометеорологиялық станцияны 30 жылдан астам уақыт басқарып келе жатқан аңызға айналған метеоролог Петр Лупенков туралы баяндайды. «Қуатты серіктес» деректі фильмі Қазақстан Президенті Қасым-Жомарт Тоқаевтың 2025 жылғы желтоқсандағы Жапонияға мемлекеттік сапары мен екі ел арасындағы стратегиялық серіктестіктің дамуына арналған. «Travel Kazakhstan» картинасы Қазақстанның табиғи және мәдени байлығын, сондай-ақ туризм саласының әлеуетін таныстырады. Ал «Серт» фильмі 2024 жылғы көктемдегі алапат су тасқыны кезінде ел тұрғындарының бірлігі мен жанқиярлығын баяндайды.

Дәл осы «Серт» фильмі Павлодардағы көрсетілімді ашты. Картинада Мемлекет басшысының тапсырмаларын орындау аясында зардап шеккен өңірлерді қалпына келтіру, тұрғындардың шығынын өтеу және табиғи апаттың салдарын жою бағытында атқарылған ауқымды жұмыстар көрсетілген. Көрермендер соңғы 80 жылдағы ең ірі су тасқынынан кейін Атырау, Ақтөбе, Ақмола, Қостанай, Солтүстік Қазақстан және Батыс Қазақстан облыстарының қалай өзгергенін көрді. Сонымен қатар, табиғи апатты бірге еңсерген адамдардың тағдыры мен қиын сәтте қолдау көрсеткен жандардың оқиғалары баяндалады.

Деректі кино орталығының аға редакторы әрі сценарий авторы Эльмира Ишмұхаметованың айтуынша, ең әсерлі туындылардың бірі – Құлалы аралында жұбайымен бірге ондаған жыл бойы оқшау өмір сүріп келе жатқан метеоролог туралы фильм.

– Бұл – табиғат аясында, өркениеттен алыс өмір сүруге дағдыланған ерекше жан. Ол әр үш сағат сайын ауа райы туралы мәлімет жіберіп, теңізшілердің қауіпсіз жүзуіне көмектеседі. Фильм «Жұмысшы мамандықтар жылы» идеясы аясында түсірілді. Бұл – өз кәсібіне адал болып, өмірін адамдарға, мамандығына және теңізшілерге қызмет етуге арнаған адамның тарихы, – деді Эльмира Ишмұхаметова.

Сценарий авторының айтуынша, фильмнің басты кейіпкеріне жету оңай болмаған. Түсірілім тобы аралға тек екінші әрекетте ғана барған.

– Біз Петр Лупенковпен үш жыл бұрын таныстық. Сол кезде түсірілімге бармақ болғанбыз, бірақ қатты дауылдың салдарынан аралға жете алмадық. Биыл ақпан айының басында тағы бір мәрте баруға бел будық. Тағы да жете алмай қаламыз ба деген күмән болды. Алайда, бұл жолы жолымыз болды. Тіпті, аралға туған күнімде жеттік. Бұл мен үшін ең керемет сыйлық болды. Ауа райы да түсірілімге қолайлы болды, – деп еске алды сценарий авторы.

Құлалы аралы Каспий теңізіндегі Итбалықтар аралдары тобына кіреді. Форт-Шевченко қаласынан оған шамамен екі сағатта жетуге болады. Аралда 1937 жылдан бері жұмыс істеп келе жатқан метеостанция және ҰҚК Шекара қызметінің техникалық бақылау бекеті орналасқан. Мұнда тұрақты түрде тек метеоролог пен оның жұбайы ғана тұрады.

Тұрғын үй болмағандықтан, түсірілім тобы кемеде қонды.

– Біз күн сайын таңғы төртте тұрып, катермен аралға шамамен жарты сағатта жететінбіз. Петр Ивановичтің фильмге түсуге келіскені – үлкен сәттілік. Бірақ түсірілім аяқталған соң ол адамдардан шаршағанын айтты. Себебі, ол тыныштық пен жалғыздыққа үйренген, – деп еске алды Эльмира Ишмұхаметова.

Түсірілім аяқталғаннан кейін шығармашылық топ пен фильм кейіпкерінің байланысы үзілген жоқ. Олар әлі күнге дейін хабарласып тұрады. Фильмнің арқасында Петр Лупенковты мыңдаған қазақстандық, соның ішінде оның ауа райы болжамына сүйенетін теңізшілер де таныды.

Тағы бір «Travel Kazakhstan» фильмі еліміздің туристік әлеуетіне арналған. Авторлар Қазақстанның ең көрікті жерлерін, табиғи және мәдени мұрасын көрсетіп, жыл сайын елдің түкпір-түкпірінен және шетелден келетін саяхатшыларды тартатын ерекше мекендер туралы баяндайды.