Достық үйінде халықаралық жарыстарда топ жарған үздік спортшыларға құрмет көрсетілді, деп хабарлайды @Pavlodarnews.kz тілшісі.

Облыс әкімі Асайын Байханов жерлестеріміздің әлемдік спорт ареналарында жеткен жоғары жетістіктерін атап өтті.

- Биылғы жыл спорттық жетістіктерге бай болғанын атап өткім келеді. Кейбір қиындықтарға қарамастан, сіз өзіңіздің үздік екеніңізді дәлелдей алдыңыз. Сіздің жоғары кәсібилігіңіз, қайсарлығыңыз бен табандылығыңыз үшін үлкен алғысымды білдіремін. Келе жатқан жаңа жылда бақ-береке, бақыт және одан әрі табыс тілеймін, - деді Асайын Байханов.

Өңір басшысы үздік спортшылар мен жаттықтырушыларға Алғыс және ақшалай сертификаттар табыс етті. Тоғызқұмалақтан әлем чемпионатының күміс жүлдегері, Қазақстан Республикасының спорт шебері Ринат Керейбаев облыс әкіміне спортшыларға көрсеткен қолдауы үшін алғысын білдірді.

- Қолдауыңыз үшін алғыс білдіреміз. 10-16 желтоқсан аралығында Түркияда әлем чемпионаты өтті, оған 14 мемлекеттен 100 спортшы қатысты. Сол жарыста зор жетістікке жеттім. Біздің дайындық «Шахмат үйінде» өтеді. Онда жақында жөндеу өткізілді: жаңа жиһаз, техника жаңартылды, лед-экран қойылды – мұның бәрі дайындықты жеңілдетті. Рахмет, - деді Ринат Керейбаев.

Өз кезегінде Қазақстан Республикасының халықаралық дәрежедегі спорт шебері, шаңғы спортынан Әлем кубогының күміс жүлдегері Дарья Ряжко алдағы қысқы Азия ойындарында облыстың, жалпы еліміздің намысын лайықты таныстыруға уәде берді.

Соңында спортшылардың құрметіне Иса Байзақов атындағы облыстық филармонияның әртістері, Самиян тобы өнер көрсетті. Жібек Айтбаева «Сен чемпионсың» әнімен көпшіліктің қошеметіне бөленді.