Биылғы жазда курорттық аймақ бір ғана ағында бес мыңнан астам адамды қабылдауға дайын, деп хабарлайды @Pavlodarnews.kz тілшісі. 

Жасыбайда жаз маусымы шоу-бағдарламамен ашылды. Туристер үшін концерт, қолөнер бұйымдарының жәрмеңкесі, жағажай волейболынан, асық атудан және садақ атудан жарыстар ұйымдастырылды. 

Суға түсу маусымының мерекелік басталуына Павлодар, Екібастұз және Астана қалаларынан 500-ге жуық адам келді. Баянауыл ауданы әкімінің орынбасары Елдос Бариев барлығын курорттық мауысымның басталуымен құттықтады. 

– Біз сіздер үшін жұмыс істеп жатырмыз! Өңіріміздің інжу-маржанын көркейту жолында Мемлекет басшысы, облыс әкімі мен аудан әкімі де белсенді жұмыс жасауда. Шағымдар мен ұсыныстар болса, үнсіз қалмаңыздар. Біз одан әрі жетілдіреміз және дамитын боламыз. Осы жазда барлығына жақсы демалыс тілеймін!  – деді аудан әкімінің орынбасары. 

Дене шынықтыру және спорт басқармасының басшысы Дәуір Ерғабуловтың айтуынша, жыл сайын Баянауылға туристер көптеп келеді, демалыс үйлерінің саны да артуда. 

– Биыл туристер ағыны 225 мыңнан астам адамды құрайды деп күтілуде. Курорттық аймақта 52 демалыс үйі мен қонақ үй бар. Жасыбай бір ағымда ғана бес мыңнан астам адамды сыйдыра алады, – деді облыстың бас спортшысы. 

Ол Баянауыл Қазақстанның ең үздік топ 20 демалыс орнының бірі екенін еске салды. 

Жаңа маусымда туристер Жасыбайда серфинг жасай алады. Бұл туралы дене шынықтыру және спорт басқармасы мен Mixtour компаниясы өзара келісім жасады. 

– Менің ойымша, біздің одақ тиімді болады, өйткені біз туризмді іштей жақсы білеміз. Даму әлі алда, – деп уәде берді Mixtour директоры Мирас Ахметқалиев.

Оның айтуынша, Баянауыл ауданы Павлодар мен Қарағанды облыстарында қашан да танымал. Жыл сайын елорда мен Семейден туристер көбірек келеді. Соңғы уақытта шетелдіктер жиі қонаққа айнала бастады. 

— Біз Еуропадан, туристерді кездестірдік, Қырғызстан мен Ресейден де жиі келеді.  Барлық шетелдіктерге Баянауыл қатты ұнап жатыр. Менің ойымша, біз өз жерлерімізді жақсы көріп, мақтануға үйренуіміз керек. Өйткені шетелдік туристер біздің табиғатымыз үшін ұзақ жол жүреді, ал біздің тұрғындарымыздың көбі Баянауылды ұнатпайды, – деді Мирас Ахметқалиев. 

Биыл Жасыбайдағы курорттық аймақ демалушыларға жаңа ойын-сауық  ұсынды: махаббат аралынан және кері қарай көлде сап- тақталарында жүзу, джип-турлар, жаяу серуендеу және табиғи көрікті жерлерге экскурсиялар.  

Туристер Жасыбайдан алыс емес жерде Торайғыр және Сабындыкөл көлдерінде тыныштықта демала алады.