Акцияға облыстық станция мен барлық қалалық жедел жәрдем қосалқы станцияларының қызметкерлері қатысты, деп хабарлайды @Pavlodarnews.kz тілшісі.

Медицина қызметкерлері Павлодар облысы бойынша жарияланған аумақтарды абаттандыру және жинау айлығына алғашқылардың бірі болып қосылды. Кезектен тыс сенбілікке 40 адам қатысып, орталық жедел жәрдем станциясына және Павлодар, Екібастұз және Ақсу қалаларындағы бес қосалқы станцияға іргелес учаскелерді қоқыстан тазартты. Барлығы 103 қызметкерлері шамамен төрт тонна қоқыс жинады.

– Тазалық – денсаулық кепілі, – дейді Павлодар жедел жәрдемінің инженерлік-техникалық қызметінің басшысы Серік Ишманов. – Бұл тезис бізді қоршаған ортаға да қатысты. Айналамыз неғұрлым таза болса, соғұрлым өзіміз жақсы боламыз. Біздің қызметіміз де тазалық пен тәртіпті сақтауды қажет етеді. Егер әркім өз тұратын орнын тазалайтын болса, үлкен іске үлестерін қосар еді.

Павлодар облысының қалалары мен аудандарында аумақты абаттандыру және жинау айлығы 31 наурыздан 1 мамырға дейін жарияланды. Биыл ол «Таза Қазақстан» экологиялық акциясы аясында өтуде.