Сайлау учаскелері 20:00-ге дейін ашық болады, деп хабарлайды @Pavlodarnews.kz

Тұрғындар таңғы сағат 7:00-ден бастап дауыстарын беріп жатыр.

Павлодар ауылында дауыс беру №40 мектептің ескі ғимаратында орналасқан №48 учаскеде және мектептің жаңа ғимаратындағы №49 учаскеде жүзеге асырылуда. 

№48 учаскелік сайлау комиссиясы төрағасының орынбасары Толқын Карпбаеваның айтуынша, ауылда барлығы 4281 сайлаушы тіркелген. 

– Сайлаушылар белсенді дауыс беруде. Тұрғындар ауылдың болашағы өздерінің беретін дауыстарына байланысты екенін түсініп, көтеріңкі көңіл-күйде келіп, таңдауларын жасауда, – деді Толқын Карпбаева.

Сонымен қатар, сайлау учаскелерінің жанында жәрмеңке ұйымдастырылған. 

Атамекен кентінде төрт сайлау учаскесінде  дауыс беруге болады:

№41 учаске – №33 мектеп ғимараты;

№42 учаске – Жаяу Мұса атындағы МҮ ғимараты;

№43 учаске – Жолқұдық элеваторының ғимараты;

№44 учаске – №32 мектеп ғимараты.

Атамекенде жалпы 6 716 сайлаушы тіркелген. 

– Сайлау учаскелерінде дауыс беруге, оның ішінде мүмкіндігі шектеулі азаматтарға да барлық жағдай жасалған. Жасырын дауыс беруге арналған кабиналар бар. Жалпы, сайлау белсенді өтуде, - деді №42 учаскелік сайлау комиссиясының төрағасы Алтынбек Тағлымов.

Оның сөзінше, ауыл тұрғындары келіп, өз кандидатына дауыс беру – әркімнің азаматтық борышы екенін түсінеді.