Жыл басынан бері аймақ жолдарында жылдамдық режимін бұзудың 100 мыңнан астам дерегі анықталды, деп хабарлайды @Pavlodarnews.kz тілшісі.

Жолдағы қауіпсіздік әрбір қозғалыс қатысушысына байланысты. Алайда, кейбір жүргізушілер ережені сақтамай, қайғылы жағдайларға әкелуі мүмкін әрекеттерге барады. Павлодар облысының жолдарында жиі кездесетін құқық бұзушылықтардың бірі – белгіленген жылдамдықты арттыру.

– Мәселен, Павлодар – Астана автожолында Subaru Legacy көлігінің жүргізушісі 140 км/сағ жылдамдық шегін бұзған. Оның нақты жылдамдығы 179 км/сағ болған. Құқық бұзушылық Zerek-2 автоматтандырылған бағдарламалық кешені арқылы тіркелді. Енді жүргізушіге айыппұл салынуы мүмкін, – деп хабарлады облыстық полиция департаментінде.

Құқық қорғау органдарының айтуынша, көлік жылдамдығы жүргізушінің немесе жолаушының асығыстығына байланысты болмауы керек. Өйткені бұл жолдағы қауіпсіздікке қауіп төндіреді.