Салымшылардан төрт жылдың ішінде қаржы пирамидасының пайдасына алты миллион теңгеге жуық қаражат келіп түсті, хабарлайды @Pavlodarnews.kz.

Павлодар қаласының № 2 сотында қаржылық пирамиданы құрып және оған басшылық еткен, азаматтардан ірі мөлшерде қаражат тарту фактісі бойынша ер адамға қатысты ҚР ҚК-нің 217-бабының 2-бөлігінің 4-тармағы бойынша қылмыстық іс қаралды. 

Айыпталушы Qnet компаниясында тәуелсіз өкілі ретінде тіркеліп, 2019 жылы Екібастұз және Павлодар қалаларында кеңселерін ашқан. Qnet-тің белгіленген жұмыс рәсімінің саясатын бұза отырып, компанияға жаңа қатысушыларды тарту мақсатында, ондағы тапқан ақша мен кірісті ұлғайту мен табу жоспарлары туралы ақпаратты белсенді түрде таратқан.

Осылайша, ол 2019 жылдың желтоқсаны мен 2022 жылдың 12 шілдесі аралығында қаржы пирамидасының салымшыларының, яғни жәбірленуші болып танылғандардың жалпы сомасы 5 983 000 теңге қаражатын тартқан.

Ер адамның электрондық поштасына сәйкес Ұлттық банк бағамы бойынша eCard (АҚШ доллары) арқылы төлемнің жалпы сомасы жеті миллион теңгеден астам соманы құрады. Сотта ол кінәсін және жәбірленушілердің азаматтық талаптарын мойындамады, келтірілген залалды өтемеді.

Қаржылық (инвестициялық) пирамиданы құрғаны және басшылық еткені үшін ( ҚК-нің 217-б. 2-б. 4-т.) заңда негізгі жаза ретінде үш жылдан жеті жылға дейінгі мерзімге бас бостандығынан шектеу немесе бас бостандығынан айыру көзделген.

–        Тәрбиелеуінде кішкентай баласының болуын, оның бұрын сотталмағанын және жас екенін ескере отырып, сот үш  жыл мерзімге азаматтардың ақшалай қаражаты мен инвестицияны тартуға байланысты қызметпен айналысу құқығынан айыра отырып, мүлікті тәркілеусіз қылмыстық-атқару жүйесінің қауіпсіздігі барынша төмен мекемесінде үш жылға бас бостандығынан айыруды тағайындады,– деді Павлодар қаласының № 2 сотының баспасөз қызметінде.

Үкім заңды күшіне енбеді.