Құтқарушылар бірінші қабаттағы пәтерде жиһаз бен тұрмыстық заттардың жанып жатқанын анықтады, деп хабарлайды @Pavlodarnews.kz тілшісі.

Оқиға Бұқар жырау көшесіндегі бес қабатты тұрғын үйде болды. Өрт туралы хабарлама түскеннен кейін оқиға орнына ТЖМ қызметкерлері жедел жетті.

– Барлау жұмыстары барысында көрші пәтерден мүмкіндігі шектеулі ер адам құтқарылды. Өрт қысқа мерзімде оқшауланып, толық сөндірілді. Жалынның басқа бөлмелерге таралуына жол берілген жоқ, – деді ҚР Төтенше жағдайлар министрлігінің баспасөз қызметі.

Оқиға салдарынан зардап шеккендер жоқ. Қазіргі уақытта өрттің шығу себебін мамандар анықтап жатыр.