Ол дағдарыс орталығына орналастырылды, деп хабарлайды @Pavlodarnews.kz.

Павлодар қаласының отбасылық-тұрмыстық зорлық-зомбылыққа қарсы күрес бөліміне кәмелетке толмаған балалары бар, қиын өмірлік жағдайға тап болған және тұрмыстық зорлық-зомбылықтың құрбанына айналған әйел жүгінді.

– Оның айтуынша, соңғы уақытта жұбайы тұрмыстық ұсақ-түйек себептермен оған агрессия танытып, теріс көзқарас көрсете бастаған, бұл кейіннен жүйелі жанжалдар мен отбасылық-тұрмыстық зорлық-зомбылық фактілеріне ұласқан. Бөлімше қызметкерлері әйел мен оның кәмелетке толмаған балаларының қауіпсіздігін қамтамасыз ету бойынша шұғыл шаралар қабылдады, – деді облыстық полиция департаментінде.

Зардап шеккен әйелдің құқықтары мен мүдделерін қорғау, сондай-ақ қауіпсіз өмір сүру жағдайларын жасау мақсатында әйел төрт кәмелетке толмаған баласымен бірге Павлодар қаласының дағдарыс орталығына орналастырылды. Кризистік орталықта зардап шеккен адамға психологиялық, құқықтық және моральдық қолдауды қамтитын кешенді көмек көрсетіледі. Алдын алу және түсіндіру әңгімелері жүргізіліп, алдағы іс-қимыл тәртібі мен құқықтық қорғау шаралары түсіндірілді.

Полиция қызметкерлері өмір мен денсаулыққа қауіп төнген жағдайда «102» нөмірі арқылы ішкі істер органдарына дереу хабарласу қажеттігін еске салады. Отбасылық-тұрмыстық зорлық-зомбылықтың бірде-бір фактісі назардан тыс қалмайды, ал әрбір жүгінген азаматқа ҚР заңнамасы шеңберінде қорғау мен көмекке кепілдік беріледі.