Туристік агенттік билет құнының 30 пайызын ұстап қалмақ болғанымен, апелляциялық сот бұл әрекетті заңсыз деп таныды, деп хабарлайды @Pavlodarnews.kz.

Павлодар облысының тұрғыны Дженнифер Лопестің Қазақстандағы концертіне сатып алған билетінің толық құнын сот арқылы өндіріп алды. Туристік агенттік билет құнының 30 пайызын ұстап қалмақ болғанымен, апелляциялық сот бұл әрекетті заңсыз деп таныды.

Іс материалдарына сәйкес, тұтынушы концертке арналған билет үшін 376 869 теңге төлеген. Алайда билет оның қолына берілмеген. Соған қарамастан, қызмет көрсетуші компания ақшаны толық қайтарудан бас тартып, келісімшарт талаптарына сілтеме жасап, төленген соманың 30 пайызын ұстап қалуды жоспарлаған.

Дауды қараған апелляциялық сот тұтынушының талаптарын қанағаттандырып, туристік агенттіктің әрекетін заң талаптарына сәйкес келмейді деген қорытындыға келді. Сот компанияны билет үшін төленген 376 869 теңгені толық көлемде қайтаруға міндеттеді.

Мұндай дауларда негізгі мәселе – қызметтің нақты көрсетілуі. Егер тұтынушы сатып алған билетін немесе өзге де қызметті іс жүзінде алмаса, қызмет көрсетуші төлемнің бір бөлігін негізсіз ұстап қала алмайды. Қазақстанның тұтынушылардың құқықтарын қорғау туралы заңнамасы көрсетілмеген қызмет үшін ақшаны қайтаруды көздейді.

Еске салсақ, америкалық поп-жұлдыз Дженнифер Лопес биыл Қазақстанда алғаш рет концерт өткізеді. Әншінің Астанадағы концертіне билеттер сатылымға шыққаннан кейін бірнеше минут ішінде үлкен сұранысқа ие болып, билет сатып алу барысында техникалық ақаулар мен тапсырыстардың жойылуына қатысты көптеген шағым түскен болатын. Осыған байланысты тұтынушылар мен билет сатушылар арасында бірқатар дау туындаған еді.