Жылжымалы шаштараз қызметі қарттар үйіне үшінші рет келіп тұр, деп хабарлайды @Pavlodarnews.kz.

Облыстық қарттар мен мүгедектігі бар адамдарға арналған жалпы үлгідегі арнаулы әлеуметтік қызметтер көрсету орталығында тұратын қариялар үшін күн ерекше басталды. «Біртұтас тәрбие» еріктілер қозғалысы шеңберінде Павлодар қызмет көрсету колледжінің ШС-22 тобының 17 студенті ерікті түрде шаштарын тегін қидыртып, шаш үлгілерін жасады. Орталықтың дәлізінде шашын алғысы келетіндерден ұзын-сонар кезек пайда болды. Тақия киген аталардың арасында ерте тұрған Асылбек Ажикенов бар. Ол басқалардан қалыс қалмай, болашақ шаштараздардың жұмысына бағасын берді.

– Күн жақсы басталды. Киімдерімізді ауыстырып, тамағымызды ішіп алған соң осында келдік. Қыздардың жұмыстары ұнап жатыр, өйткені шашымды жақсы алып берді. Мен әрдайым тақыр қылып алдырамен, себебі, ақ шаш басты қышытады. Енді өзімді жас секілді сезінемін, – деді Асылбек Ажикенов.

Колледждің өндірістік оқыту шебері Маржан Тынысбектің айтуынша, студенттер бұған дейін орталықта екі рет болған. 

– Алғаш рет жас қыздар осында келген кезде көздерінде үрей болған еді.    Қариялармен қалай сөйлесіп, жақындауды білмеген. Ал енді ата мен әжелер біз келгенін білгенін естігенде даладан бізді тосып, күтіп алады, – деді Маржан Тынысбек. – Қарт адамдарға бір жағынан көңіл сыйласақ, екінші жағынан студенттеріміз тәжірибе жинайды. Тағдырдың жазуымен болар, осындағы әр адамның өз өмірлік хикаясы болады. Сондықтан олардың көңілін көтеріп, энергиямен бөлісеміз,– деді Маржан Тынысбек.

Оның сөзінше, әйел адамдарға шаш алдырудан бөлек, шаш үлгісі жасалады. 

– Егер ол шашын бояп, бұйралағысы келсе, біз оның бетін қайтармай, ойын жүзеге асыруға қолдан келгенше тырысамыз. Қиын жұмысты атқарған студенттерімді әрдайым бақылауда ұстаймын. Қателіктерін бірден айтып, оларды бірге түзетеміз, – деді Маржан Тынысбек.

Төрт қарияның шаш үлгісін жасаған студент Диана Шайкенова оқумен қатар жұмыс істеп жүр. 

– Адамдар әртүрлі болады. Олардың көңіліне қарап, сөздерді талғайсың. Тіпті, отырып, жүре алмайтын қариялардың да шашын алғыздық. Бастапқыда қорқынышты болды. Енді қолың икемденіп алған соң тәжірибедегі әдістерді орындайсың, – деді Диана Шайкенова.

Айта кетейік, колледж студенттері волонтерлік іспен бұрыннан айналысып келеді.

– Біз 5-6 жыл бұрын тек колледжде ғана емес, сонымен қатар жылжымалы түрде де қызмет көрсете аламыз деп шештік. Мектептерге, қарттар, балалар үйлеріне барып, тегін шаштараз қызметтерін ұсынамыз, – деді колледж директоры Азамат Кашитов.

Оның сөзінше, орталық әр аптаның сәрсенбі күні келіп тұруды сұраған. Алайда екінші курс студенттерінің цехта жұмыстары бар болғандықтан, бір аптадан кейін келіп тұруға шешім қабылданды.

Фото: автор