Әккі қуларға алданған тұрғын тәртіп сақшыларының кәсібилігіне алғысын білдірді, деп хабарлайды @Pavlodarnews.kz тілшісі.

Ауыл тұрғыны тиімді несие рәсімдеуге көмектесеміз деген желеумен әрекет еткен интернет-алаяқтардың құрбаны болған. Алаяқтар оның жеке жинақ ақшасын иемденіп кеткен. Жәбірленуші полицияның кезекші бөліміне жүгінгеннен кейін бірден сотқа дейінгі тергеп-тексеру басталады. Арман Шакаровтың сауатты іс-әрекеттері мен ақпараттық технологиялар арқылы жасалған ақша аударымдарын мұқият талдауының арқасында қылмыстың мән-жайы қысқа мерзімде анықталып, қылмыс ашылды.

Шарбақты ауданының тұрғыны Дмитрий Ревякин аудандық полиция бөлімінің аға тергеушісі Арман Шакаровқа шынайы алғысын білдірді. Ол офицердің жоғары кәсібилігін, жедел әрекетін және интернет-алаяқтыққа қатысты күрделі істі сапалы тергегенін ерекше атап өтті.

Дмитрий Ревякин тергеу барысында полиция тарапынан нақты қолдау сезінгенін және істің әділ шешілетініне сенімді болғанын атап өтті.

— Өзімнің қиын жағдайыма түсіністікпен қарап, жауапкершілік танытқан аға тергеушіге шын жүректен алғысымды білдіремін. Оның кәсіби жұмысының арқасында алаяқтық фактісі ашылып, кінәлі адам анықталды. Адал қызметі, принципшілдігі және адамдарға көрсеткен нақты көмегі үшін рақмет, — деді Дмитрий Ревякин.

Аудандық полиция бөлімінде киберқылмыстарға қарсы күрес ішкі істер органдары қызметінің басым бағыттарының бірі болып қала беретінін атап өтті. Тәртіп сақшылары күн сайын интернет-алаяқтықпен күресіп, азаматтардың қаржылық қауіпсіздігін қорғау бағытында жүйелі жұмыс жүргізуде.