Жаңа құжат 2026 жылғы 1 қаңтардан бастап күшіне енеді, деп хабарлайды @Pavlodarnews.kz тілшісі.

Павлодар қалалық мәслихатында депутаттар мен мемлекеттік кірістер басқармасы өкілдері кездесіп, салық заңнамасындағы маңызды өзгерістерді талқылады. Бұл кездесудің басты себебі – жаңа Салық кодексі.

– Бұған дейін мәслихат бөлшек салық мөлшерлемесін төмендету құқығын пайдаланып, бұл жеңілдікті мерзімсіз етіп бекіткен болатын. Бұл кәсіпкерлерге салықтық жүктемені азайтып, қолайлы жағдайда жұмыс істеуге мүмкіндік берді. Алайда, 2026 жылғы 1 қаңтардан бастап Қазақстанда жаңа Салық кодексі күшіне енеді. Онда «бөлшек салық» арнайы режимі толығымен алынып тасталады. Онымен бірге мәслихаттар бұрын қабылдаған жеңілдіктердің де құқықтық негізі жойылады, – деді қалалық мәслихаттың баспасөз қызметі.

Қалалық мәслихат депутаттары жыл соңына дейін жергілікті атқарушы органдардың ұсыныстарына сәйкес салық мөлшерлемесін өзгерту туралы шешім қабылдауы тиіс. Депутаттардың мөлшерлемені 50%-дан артық емес көлемде өзгертуге құқығы бар.

Жаңа шешім келесі жылдың 1 қаңтарынан бастап күшіне енуі үшін, оны 1 желтоқсаннан кешіктірмей қабылдау қажет.