Медициналық авиация әуе көлігін қолдана алмай, пациенттерді жерүсті көлігімен жеткізді, деп хабарлайды @Pavlodarnews.kz тілшісі.

Ауа райының қолайсыздығына қарамастан, Павлодар облысының медициналық авиация қызметі демалыс күндері үш шұғыл шақыртуға жауап беріп, барлық пациенттерді дер кезінде облыстық ауруханаларға жеткізді.

– Қар жауып, ауа райының қолайсыз болуына байланысты әуе көлігін пайдалана алмадық, сондықтан барлық науқастар автокөлік арқылы аман-есен Павлодардағы стационарларға жеткізілді. Қазіргі уақытта оларға қажетті медициналық көмек көрсетіліп жатыр, – деді медициналық авиация бөлімінің меңгерушісі Алмагүл Бесембинова.

Бірінші өтінім 11 қазан күні таңертең Ертіс ауданынан түскен. Бұл күні өңірде қалың қар жауып, оның биіктігі 20 сантиметрге дейін жеткен болатын.

Дәрігерлерге тыныс жетіспеушілігі диагнозы қойылған шала туған нәресте қызды Павлодарға жеткізу қажет болды. Неонатологиялық бригада сәбиді облыстық перинаталдық орталыққа жеткізді.

Сол күні Ақсу қалалық ауруханасынан да шұғыл өтінім түсті.

– Өкпе артериясының тромбоэмболиясы диагнозы қойылған 75 жастағы ер адам облыстық кардиологиялық орталыққа жеткізілді. Тасымалды реаниматологиялық бригада орындады, – деді Алмагүл Бесембинова.

Келесі күні, тағы да Ақсудан шақырту түскен – инфаркт диагнозы қойылған 60 жастағы ер адамға шұғыл көмек қажет болған. Пациент Павлодар қаласындағы кардиоорталыққа жеткізілді.

Қалың қар мен қатқақ желге қарамастан, өңірдің жедел жәрдем қызметі де тұрақты режимде жұмыс істеді.

Облыстық жедел жәрдем станциясының дерегінше, барлық түскен шақырулар бекітілген уақыт нормаларына сай орындалған.

 Медициналық авиация қызметі облыстың шалғай ауылдарындағы және жол қатынасы қиындаған елді мекендердегі науқастарды тасымалдау үшін тәулік бойы жұмыс істейді.