Жүктілікті жоспарлау – болашақ ананың ғана емес, әкенің де денсаулығына жауапкершілікпен қарауды талап ететін маңызды кезең. Дәрігерлер жүктілікке дейін 2-3 ай бұрын прегравидарлы дайындықтан өтуді ұсынады, деп хабарлайды @Pavlodarnews.kz тілшісі.

Павлодарлық «Almaz Medical Group» емханасының акушер-гинеколог дәрігері Айгүл Еренғайыпованың айтуынша, прегравидарлы дайындық – жүктілікке алдын ала дайындалу, денсаулық жағдайын тексеру, қажетті талдаулар тапсыру, ауруларды анықтап, емдеу және ағзаны жүктілікке дайындау.

Міне, болашақ ата-аналарға арналған маңызды чек-парақ:

1. Дәрігерге қаралыңыз

Бірінші қадам

• Жалпы тәжірибелік дәрігердің қабылдауына жазылу.
• Гинекологтың кеңесінен өту.
• Созылмалы аурулар болса, дәрігерге хабарлау.
• Қажет болған жағдайда қосымша мамандардың тексеруінен өту.

2. Қажетті талдауларды тапсырыңыз

• Жалпы қан талдауы.
• Жалпы зәр талдауы.
• Қан сарысуындағы глюкоза деңгейін анықтау.
• АИТВ (ВИЧ) инфекциясына тест.
• В және С гепатиттеріне талдау.
• Мерезге (RW) талдау.
• Гинекологиялық жағынды.
• Электрокардиография (ЭКГ).
• Флюорографиялық тексеру.

Талдаулар мен тексерулер тізімін дәрігер денсаулық жағдайына қарай нақтылайды.

3. Гинекологиялық тексеруден өтіңіз

• Гинекологтың толық тексеруінен өту.
•  Қажет болған жағдайда кіші жамбас ағзаларының УДЗ-сын жасау.
• Шағымдар болса, инфекцияларға тексерілу.
• Анықталған мәселелерді жүктілікке дейін емдеу.

4. Фолий қышқылын қабылдауды бастаңыз (Кез келген дәрілік препаратты қабылдамас бұрын дәрігермен кеңесіңіз)

Маңызды

• Фолий қышқылын жүктілікке дейін қабылдауды бастау.
• Көпшілік әйелдерге ұсынылатын тәуліктік мөлшері – 400 мкг.
• Жоғары дозаны тек дәрігердің нұсқауымен қабылдау.

Фолий қышқылы болашақ сәбидің жүйке түтігі ақауларының алдын алуға көмектеседі.

5. Өмір салтыңызды реттеңіз

• Темекі шегуден бас тарту.
• Алкогольден бас тарту.
• Дұрыс әрі теңгерімді тамақтану.
• Ұйқы режимін сақтау.
• Тұрақты физикалық белсенділікпен айналысу.
• Артық салмақ болса, дәрігермен бірге салмақты қалыпқа келтіру жоспарын жасау.
• Созылмалы ауруларды бақылауда ұстау.

6. Болашақ әкенің де денсаулығы маңызды.

Жүктілікке дайындық тек әйел адамға қатысты емес. Ер адам да өз денсаулығына көңіл бөлуі керек.

• Темекіден бас тарту.
• Алкогольді шектеу, мүмкіндігінше толық бас тарту.
• Созылмалы ауруларды бақылау.
• Дұрыс тамақтану.
• Ақуыз бен темірге бай тағамдарды жеткілікті тұтыну.
• Дене белсенділігін сақтау.
• Қажет болған жағдайда дәрігерге қаралып, тексеруден өту.

Прегравидарлы дайындық – дені сау жүктілікке жасалған алғашқы қадам. Жүктілікті жоспарлаудан 2-3 ай бұрын дәрігерге қаралып, қажетті тексерулерден өту болашақ ана мен баланың денсаулығы үшін маңызды.