Қала әкімі Аян Бейсекин тұрғындардың өтініштері бойынша әріптестерімен бірге қаланы аралауды жалғастырды, деп хабарлайды @Pavlodarnews.kz тілшісі.

Машхүр Жүсіп, 163 мекенжайында әкім жаңадан орнатылған футбол алаңын тексерді.

– Біз тек өткен жылдың өзінде 20-ға жуық жаңа футбол алаңын орнаттық. Енді алдымызда 30-ға жуық алаңды жаңғырту міндеті тұр, оны келесі жылдың жұмыс жоспарына енгіземіз. Сонымен қатар, жергілікті бюджет аясында жаңа алаңдар салынады, соның ішінде сіздің аулаңыздағы алаң да бар, – деді Аян Бейсекин аула тұрғындарына.

Тұрғындардың бірі аула жарықтандыруының жоқтығын айтып шағымданды. Бас инженер тек екі бағананың ғана жанбай тұрғанын растап, олардың бүгін іске қосылатынын жеткізді.

Сонымен қатар, тұрғын «Империал» пәтер иелерінің кооперативінің ұйымдастыру жұмыстарының жетіспеушілігін, үйді тәртіпке келтіру үшін адамдарды ұйымдастыру қажеттігін мәлімдеді.

– Пәтер иелерінің кооперативін басқару үшін жалпы үй жиналыстарын өткізу мәдениетін қалыптастыру қажет. Жұмыс туралы есептерін тыңдап, міндеттер қойыңыздар. Егер басқарушы орган қойылған міндеттерді орындамаса, ондай ұйымнан бас тартып, үйге қызмет көрсетудің басқа нұсқаларын іздеу керек. Қазақтың жақсы сөзі бар: «Жақсылықты көре білген көз қымбат, орнымен айтылатын сөз қымбат, бірақ бәрінен де артымыздан қалатын із қымбат». Сондықтан да барынша еңбек жасауға тырысамыз, – деп қорытындылады Аян Бейсекин.

Сондай-ақ, Екібастұздың 40 жылдығы көшесі, 41 мекенжайында тұрғындар тротуар мен жол қосу мәселесін көтерді.

– Бұл жердегі жолды келесі жылы жасаймыз. Тротуар жасаймыз, ұсақ тастарды әкеліп тегістейміз. Асфальттау – уақытша шешім. Жарықтандыруға келсек, бұл жұмысты жүргізу үшін арнайы техникалық есептеулерді қажет ететін жобалық-сметалық құжаттама әзірленуде. Соңғы екі жылда біз қала бойынша жарықтандыру бойынша орасан зор жұмыс атқардық, – деді қала басшысы.

Әкімнің айтуынша, биыл барлық аулалар бойынша жұмыстар аяқталады, бірақ назар аударуды қажет ететін учаскелер әлі де бар. Алдымен техникалық құжаттама дайындалып, кейін жол, тротуар, жарықтандыру және аула абаттандыру жұмыстары жүргізіледі. Сондай-ақ, көлік тұрағын салу жоспарланған. Оның сөзінше, бұл жұмыстар әкімдіктің назарында, ал облыс әкімінің қолдауымен соңғы екі жылдың ішінде екі жүзге жуық аула қалпына келтірілген.